Bakı. TurkicWorld:
bp şirkəti "Azəri-Çıraq-Dərinsulu Günəşli" (AÇG) yatağının işlənməsi layihəsinin operatoru olaraq "Dərinsulu Günəşli" platformasında planlı profilaktik işlər barədə məlumat verib.
TurkicWorld bu barədə bp şirkətinə istinadən xəbər verir.
"Aprelin 25-dən başlayaraq planlı profilaktik işləri səmərəli şəkildə aparmaq üçün "Dərinsulu Günəşli" yatağından hasilat 15 günlüyə dayandırılıb", - deyə bp şirkətindən bildiriblər.
Klapanların, radioizotop mənbələrin dəyişməsi və digər təmir işləri nəzərdə tutulur.
"Platformanın müvəqqəti dayandırılması bp-nin 2024-cü il üzrə istehsalat planına daxildir", - deyə press-relizdə qeyd olunub.
AÇG-nin digər platformalarından, eləcə də Səngəçal terminalında "Şahdəniz" yatağındakı platformalardan hasilat, Bakı-Tbilisi-Ceyhan və Cənubi Qafqaz Boru Kəməri vasitəsilə ixrac əməliyyatları ştat rejimində davam edir.
