Oliy Majlis Senatida jahonning nufuzli ta’lim muassasalaridan biri – AQSHning Garvard universiteti qoshida faoliyat yurituvchi Markaziy Osiyo va turkiy mamlakatlar Kokusiga a’zo talabalar bilan uchrashuv tashkil etildi.
Unda Senat Raisi Tanzila Norboyeva hamda Ijtimoiy himoya milliy agentligi direktori birinchi o‘rinbosari Shahnoza Mirziyoyeva ishtirok etdi.
Talabalar bilan bo‘lgan muloqot davomida O‘zbekistonda iqtisodiyot, ta’lim tizimi va davlat boshqaruvi sohalarida amalga oshirilayotgan keng qamrovli yangilanishlar, yoshlarni qo‘llab-quvvatlashga qaratilgan tashabbuslar hamda qonunchilikdagi dolzarb o‘zgarishlar yuzasidan fikr almashildi. Ayniqsa, mamlakatimizda aholining ehtiyojmand qatlamlarini qo‘llab-quvvatlash, ijtimoiy xizmatlar sifatini oshirish, manzilli yordam tizimini takomillashtirish hamda zamonaviy va samarali ijtimoiy himoya mexanizmlarini tatbiq etish borasida izchil ishlar amalga oshirilayotgani qayd etildi.
Garvard universiteti qoshidagi mazkur Kokus bugungi kunda mintaqa davlatlari, jumladan, O‘zbekiston va AQSH o‘rtasida ta’lim, ilm-fan va innovatsiyalar sohasidagi hamkorlikni mustahkamlashga xizmat qilayotgan muhim yoshlar platformasiga aylanib bormoqda. U turli mamlakatlardan kelgan yoshlarni birlashtirib, o‘zaro muloqot va anglashuvni rivojlantirish orqali tinch va barqaror jamiyat barpo etishga hissa qo‘shmoqda.
Talabalar O‘zbekistonning ochiq va pragmatik tashqi siyosatiga katta qiziqish bildirib, bu yo‘nalishdagi amaliy tajriba bilan yaqindan tanishish istagini bildirdi.
Uchrashuv chog‘ida T.Norboyeva mamlakatda yoshlar siyosatiga alohida e’tibor qaratilayotganini ta’kidlab, ularning tashabbus va g‘oyalarini qo‘llab-quvvatlash, zamonaviy bilim hamda ko‘nikmalarga ega bo‘lishi uchun zarur sharoitlar yaratish davlat siyosatida ustuvor yo‘nalishlardan biri ekanini qayd etdi. Shu bilan birga, yoshlarning global ilmiy hamjamiyatga integratsiyalashuvini ta’minlash, innovatsion g‘oyalarni rag‘batlantirish va xalqaro hamkorlikni kengaytirish muhim vazifalar sifatida belgilangani aytib o‘tildi.
O‘z navbatida, Sh.Mirziyoyeva kelajak istiqbollarini yoshlar ishtirokisiz muhokama qilib bo‘lmasligini ta’kidladi. Bugungi kunda dunyo shiddat bilan o‘zgarmoqda, hozir qabul qilinayotgan qarorlar esa bevosita kelgusi avlod hayotini belgilab beradi. Shu bois, yoshlarning fikrlari, tashabbuslari va, ayniqsa, ularni o‘ylantirayotgan masalalarga quloq tutish g‘oyat muhimdir. Bu yosh avlod kelajakni qanday tasavvur qilishi hamda ushbu jarayonda mamlakatimiz qanday o‘rin egallashi mumkinligini anglash uchun qulay imkoniyatdir.
Tadbir davomida tajriba almashish, yangi tashabbuslarni muhokama qilish hamda kelgusida qo‘shma ta’lim va ilmiy loyihalarni amalga oshirish imkoniyatlari yuzasidan taklif va tashabbuslar ilgari surildi.
Norgul Abduraimova,
Sarvar O‘rmonov (surat),
O‘zA
