BAKI,TurkicWorld,Yusif Şərifzadə
Livan parlamentinin sədri Nəbih Berri ABŞ-ın Livan üzrə Hərbi Əlaqələndirmə Qrupunun rəhbəri, general Cozef Klerfildlə görüşüb. Görüşdə İsrailin Livanın cənubuna hücumları və bölgədə davam edən gərginlik müzakirə olunub.
TurkicWorld xəbər verir ki, Nəbih Berri görüş zamanı İsrailin 2024-cü ilin noyabrından etibarən Livana və ölkənin cənubuna qarşı sistemli şəkildə hücumlar həyata keçirdiyini bildirib.
Berri İsrail hücumları nəticəsində yaşayış məntəqələrinin, kəndlərin, əkin sahələrinin və meşələrin dağıdıldığını, həmçinin tarixi və mədəni irs obyektlərinə ziyan dəydiyini qeyd edib.
Livan parlamentinin sədri İsrailin hərbi əməliyyatları dayandırmasını və qüvvələrini beynəlxalq sərhədə qədər geri çəkməsini tələb edib.
Berri Livanın aparıcı şiə siyasətçisi olmaqla yanaşı, Hizbullahın müttəfiqi kimi tanınır. Onun sözləri Livanın cənubunda İsrail qüvvələrinin mövcudluğuna qarşı Beyrutun mövqeyini əks etdirir.
ABŞ-ın vasitəçiliyi ilə əldə olunan atəşkəs razılaşmasına əsasən, İsrail Livanın cənubundan mərhələli şəkildə geri çəkilməli, Livan ordusu isə bölgədə yerləşdirilməlidir.
Lakin Livan tərəfi İsrailin atəşkəs razılaşmasından sonra da ölkənin cənubunda hücumlarını və hərbi fəaliyyətini davam etdirdiyini bildirir.
Görüş Livanın cənubunda atəşkəsin icrası, İsrail qüvvələrinin geri çəkilməsi və bölgədə təhlükəsizliyin təmin olunması məsələlərinin yenidən gündəmə gəldiyi bir vaxtda baş tutub.
