BAKI,TurkicWorld,Yusif Şərifzadə
İran hökuməti ölkədə benzinin qiymətinin artırılması ilə bağlı qərarın tətbiqini dayandırıb. Hökumətin bu qərarı ABŞ-ın İran limanlarına tətbiq etdiyi dəniz blokadası və uzun illərdir davam edən sanksiyalar fonunda ölkənin iqtisadi vəziyyətinin ağırlaşdığı bir vaxtda qəbul etdiyi bildirilir.
TurkicWorld xəbər verir ki, İranın Fars xəbər agentliyi hökumət mənbələrinə istinadən benzinin qiymətinin artırılması ilə bağlı qərarın hazırda təxirə salındığını açıqlayıb. Parlament sədrinin müşaviri Məhəmməd-Səid Əhədian bildirib ki, hökumətin üç hakimiyyət qolunun rəhbərləri benzinin qiymətinin artırılmaması barədə qərar qəbul edib və qiymət artımını nəzərdə tutmayan təkliflərə baxılır.
Əhədian hökumət rəsmilərinə əhali arasında benzinin bahalaşacağı ilə bağlı narahatlıq yarada biləcək hər hansı addıma yol verməmələri barədə çağırış edib.
İranda benzinin qiymətinin artırılması məsələsi ölkədə iqtisadi təzyiqlərin artdığı bir dövrdə gündəmə gəlib. ABŞ-ın İrana qarşı dəniz blokadası və uzunmüddətli sanksiyalar ölkənin iqtisadiyyatına əlavə təzyiq göstərir.
Benzinin qiymətinin artırılmaması barədə qərar hökumətin əhali arasında əlavə narazılığın yaranmasının qarşısını almağa çalışdığını göstərir.
Bununla yanaşı, qiymət artımını nəzərdə tutmayan alternativ təkliflərin nəzərdən keçirilməsi hökumətin yanacaq siyasətində dəyişiklik ehtimalını tamamilə aradan qaldırmır. Hazırda benzinin qiymətinin artırılması ilə bağlı konkret yeni tarix açıqlanmayıb.
