BAKI,TurkicWorld,Yusif Şərifzadə
Nigeriya hökumətinin kriptovalyuta əməliyyatlarına yeni vergi tətbiq etməsi ölkənin rəqəmsal aktivlər bazarında mənimsənilmə səviyyəsini zəiflədə bilər. Sənaye nümayəndələri hesab edirlər ki, yeni qaydalar istifadəçiləri tənzimlənən platformalardan uzaqlaşdıra bilər.
TurkicWorld xəbər verir ki, Nigeriyanın Vergi Xidməti bu həftə kriptovalyutalar, stabilkoinlər, NFT-lər və digər virtual aktivlərlə bağlı yeni vergi qaydalarını açıqlayıb.
Yeni qaydalara əsasən, müəyyən kriptovalyuta əməliyyatlarına möhür rüsumu (stamp duty) və mənbədə tutulan vergi (withholding tax) tətbiq ediləcək.
Hökumət bu addımı dövlət gəlirlərini artırmaq, vergi sistemini müasirləşdirmək və elektron ticarət ilə rəqəmsal aktivlər kimi yeni sektorları vergi bazasına cəlb etmək məqsədi ilə izah edib.
Qaydalara görə, kriptovalyuta bazarının iştirakçıları bəzi vergiləri naira ilə deyil, rəqəmsal aktivlərlə də ödəyə biləcəklər.
Rəqəmsal Aktivlər Koalisiyasının rəhbəri Obinna İvuno bildirib ki, yeni sistem tənzimlənən platformalardan istifadəni azalda və kriptobirjaları faktiki olaraq vergi agentlərinə çevirə bilər. O vurğulayıb ki, vergi vəsaitin hərəkətinə deyil, əldə olunan mənfəətə tətbiq edilməlidir.
Nigeriya Afrikanın ən böyük kriptovalyuta bazarlarından biri hesab olunur. Rəqəmsal aktivlər ölkədə ödənişlər, yığım və beynəlxalq pul köçürmələri üçün geniş istifadə olunur.
