BAKI,TurkicWorld,Yusif Şərifzadə
İraq Milli Təhlükəsizlik Şurası ABŞ və Səudiyyə Ərəbistanının ölkə ərazisində həyata keçirdiyi və azı 20 silahlı qruplaşma üzvünün öldüyü bildirilən hava zərbələrindən sonra fövqəladə iclas keçirib. İclasda ölkənin silahlı qüvvələrinin ali baş komandanı da iştirak edib.
TurkicWorld xəbər verir ki, İraq Milli Təhlükəsizlik Şurasının yaydığı bəyanatda hökumətin bütün düşmən xarakterli hərəkətləri, onları həyata keçirən tərəfdən və göstərilən əsaslardan asılı olmayaraq qətiyyətlə rədd etdiyi bildirilib. Sənəddə vurğulanıb ki, bu cür hücumlarla mübarizə aparmaq və onlara cavab vermək yalnız İraq hökumətinin səlahiyyətinə daxildir.
Şura mübahisələrin həlli üçün diplomatik vasitələrdən istifadə edilməsinə çağırıb və İraqın regional münaqişələrdən kənarda qalmasının vacibliyini qeyd edib.
Bundan əvvəl İraq Prezident Administrasiyası da hava zərbələrini pisləyərək, ölkə ərazisinin qonşu dövlətlərə qarşı hücumlar üçün başlanğıc nöqtəsi və ya döyüş meydanına çevrilməsinin qəbuledilməz olduğunu bəyan etmişdi.
ABŞ və Səudiyyə Ərəbistanı daha əvvəl bildirmişdilər ki, əməliyyat İraqda fəaliyyət göstərən İranın dəstəklədiyi silahlı qruplaşmaların hədəflərinə qarşı həyata keçirilib və Səudiyyə Ərəbistanının enerji infrastrukturuna yönəlmiş hücumlara cavab xarakteri daşıyıb.
İran, ABŞ və Səudiyyə Ərəbistanı İraq Milli Təhlükəsizlik Şurasının son bəyanatı ilə bağlı hələlik əlavə rəsmi açıqlama verməyiblər.
