BAKI,TurkicWorld,Yusif Şərifzadə
ABŞ prezidenti Donald Tramp İordaniyada yerləşən Amerika hərbi bazasına yönəlmiş ballistik raket hücumundan sonra İrana qarşı sərt cavab veriləcəyini bir daha bəyan edib. O, həmçinin İraqda İrana bağlı silahlı qruplara qarşı keçirilən hava zərbələrinin İraq hökuməti ilə koordinasiya şəraitində həyata keçirildiyini bildirib.
TurkicWorld xəbər verir ki, "Fox News"un müxbiri Trey Yinqstin paylaşdığı məlumata əsasən, Donald Tramp ABŞ qüvvələrinin İordaniyada gecə saatlarında buraxılan İran ballistik raketlərini uğurla zərərsizləşdirdiyini deyib. Prezident bildirib ki, Amerika hərbçilərinin raketlərin qarşısını almaq üçün cəmi bir neçə dəqiqə vaxtı olub.
Tramp daha sonra İrana qarşı sərt cavab veriləcəyini vurğulayaraq, "Onlara çox sərt zərbə endirəcəyik" ifadəsini işlədib.
ABŞ prezidenti əlavə edib ki, ABŞ və Səudiyyə Ərəbistanının İraqda İrana bağlı silahlı qruplara qarşı həyata keçirdiyi hava zərbələri İraq hökuməti ilə razılaşdırılmış şəkildə icra olunub.
Tramp həmin silahlı qrupları "dünya üçün xərçəng" adlandırıb və administrasiyasının İrana bağlı qruplara qarşı əlavə tədbirləri nəzərdən keçirdiyini bildirib.
İran tərəfi və İraq hökuməti Trampın açıqlamaları ilə bağlı hələlik rəsmi münasibət bildirməyib. Məlumatlar müstəqil mənbələr tərəfindən tam təsdiqlənməyib.
