Bakı. Trend:
Qətər və Pakistan vasitəçiləri bu gün Dohada ABŞ və İran nümayəndə heyətləri ilə ayrı-ayrılıqda keçirdikləri görüşlərdə müsbət irəliləyiş əldə ediblər.
Bu barədə Pakistan Xarici İşlər Nazirliyinin bəyanatında deyilir.
Bəyanata görə, diplomatik danışıqlar daha əvvəl İsveçrədə keçirilmiş sammit zamanı qoyulmuş təməl üzərində aparılıb. Danışıqlarda iştirak edən bütün tərəflər əldə olunan dinamikanın qorunması və müzakirələrin yaxın vaxtlarda davam etdirilməsi barədə razılığa gəliblər.
"Qətər və Pakistan vasitəçiləri bu gün Dohada ABŞ və İran nümayəndə heyətləri ilə ayrı-ayrılıqda görüşlər keçiriblər. Görüşlər zamanı İslamabad Anlaşma Memorandumunun müddəaları ilə bağlı məsələlər üzrə, Lütsern gölü sammitinin davamı olaraq, müsbət irəliləyiş əldə olunub", - deyə nazirliyin bəyanatında bildirilib.
Qeyd edilib ki, İranın keçmiş Ali Rəhbəri ilə vida mərasimləri başa çatdıqdan sonra diplomatik görüşlərin növbəti raundunun keçirilməsi qrafikinin yaxın vaxtlarda təsdiqlənəcəyi gözlənilir.
Xatırladaq ki, ABŞ və İran arasında nüvə danışıqlarında irəliləyişin olmaması səbəbindən vəziyyət fevralın 28-də ABŞ və İsrailin İrana hava zərbələri endirməsindən sonra gərginləşmişdi. Buna cavab olaraq İran bölgədəki İsrail və ABŞ obyektlərinə raket və pilotsuz uçuş aparatları ilə zərbələr endirmişdi. Bundan sonra aprelin 7-də Pakistanın vasitəçiliyi ilə iki həftəlik atəşkəs barədə razılıq əldə olunmuşdu.
İran və ABŞ arasında sülh memorandumu iyunun 18-də imzalanıb. Sənədi İran Prezidenti Məsud Pezeşkian və ABŞ Prezidenti Donald Tramp imzalayıblar. Memorandum iyunun 19-da qüvvəyə minib.
İyunun 21-də isə İsveçrədə Pakistan və Qətərin vasitəçiliyi ilə İran və ABŞ arasında danışıqların ilk raundu keçirilib.
