BAKI, TurkicWorld, Orxan Qədirzadə
Səudiyyə Ərəbistanının vəliəhdi və baş naziri Məhəmməd bin Salman bin Əbdüləziz Əl Səudun sədrliyi ilə Nazirlər Kabinetinin videokonfrans formatında iclası keçirilib.
TurkicWorld xəbər verir ki, iclas zamanı vəliəhd son günlər regionda baş verən hadisələr və onların regional və beynəlxalq təhlükəsizlik və sabitliyə təsiri ilə bağlı bir sıra dost və qardaş ölkələrin liderləri ilə apardığı telefon danışıqları barədə kabinet üzvlərini məlumatlandırıb.
Nazirlər Kabineti İranın Səudiyyə Ərəbistanına, Körfəz Əməkdaşlıq Şurasına üzv ölkələrə, eləcə də bir sıra ərəb, islam və dost dövlətlərə qarşı həyata keçirdiyi hücumları kəskin şəkildə pisləyib. Bildirilib ki, mülki hədəflərin, hava limanlarının və neft obyektlərinin vurulması beynəlxalq hüququn və beynəlxalq konvensiyaların açıq şəkildə pozulmasıdır.
Kabinet Səudiyyə Ərəbistanının öz təhlükəsizliyini, suverenliyini və ərazi bütövlüyünü qorumaq, həmçinin təcavüzün qarşısını almaq üçün bütün zəruri tədbirləri görmək hüququnu təsdiqləyib.
İclasda Səudiyyə hava hücumundan müdafiə sistemlərinin ölkə ərazisində yerləşən obyekt və infrastrukturları hədəf almağa çalışan düşmən raket və pilotsuz uçuş aparatlarını zərərsizləşdirməsi də yüksək qiymətləndirilib.
Məlumatı açıqlayan media naziri Salman Əd-Dosari bildirib ki, hökumət həmçinin Səudiyyə Ərəbistanının regionda həmrəylik və əməkdaşlığın gücləndirilməsi istiqamətində Körfəz və ərəb ölkələri ilə koordinasiyanı davam etdirdiyini nəzərdən keçirib.
Nazirlər Kabineti Körfəz Əməkdaşlıq Şurası ilə Avropa İttifaqının nazirlər görüşü və Ərəb Dövlətləri Liqasının nazirlər toplantısında İranın hücumlarının pislənməsini də yüksək qiymətləndirib.
İclasda ölkədaxili məsələlər də müzakirə olunub. Region rəhbərlərinin 33-cü illik toplantısının tövsiyələrinə baxılıb və inkişaf imkanlarının genişləndirilməsi, müxtəlif sektorların potensialının gücləndirilməsi və inkişaf xidmətlərinin təkmilləşdirilməsi istiqamətində tədbirlərin davam etdirilməsi vurğulanıb.
Nazirlər Kabineti həmçinin xeyriyyəçilik sektorunun gücləndirilməsinin və sosial həmrəyliyin təşviqinin vacibliyini qeyd edib. Bu çərçivədə “Ehsan” Milli Xeyriyyə Kampaniyasının altıncı mərhələsinin uğurla keçirilməsi yüksək qiymətləndirilib.
İclasda 11 mart tarixində qeyd olunan Dövlət Bayrağı Gününün Səudiyyə dövlətinin tarixi, quruluşu və milli kimliyini əks etdirən mühüm simvol kimi əhəmiyyəti də vurğulanıb.
