BAKI,TurkicWorld
Birləşmiş Ərəb Əmirlikləri ekstremizm və terrorla mübarizə sahəsində beynəlxalq səylərdə rolunu gücləndirmək məqsədilə Xarici İşlər Nazirliyi yanında xüsusi elçi vəzifəsi təsis edib. BƏƏ Xarici İşlər Nazirliyinin yaydığı açıqlamaya görə, xarici işlər naziri Şeyx Abdullah bin Zayed Al Nahyan Maqsud Kruzu ekstremizm və terrorla mübarizə üzrə nazirin xüsusi elçisi təyin edib.
Nazirlik bildirib ki, bu qərar BƏƏ-nin qlobal miqyasda ekstremizm və terrorla mübarizədə fəal iştirakını gücləndirmək, həmçinin ölkənin bu sahədə beynəlxalq təşəbbüslərdə rolunu artırmaq məqsədi daşıyır. Açıqlamada vurğulanıb ki, BƏƏ radikalizm və zorakı ekstremizmin bütün formalarına qarşı mübarizədə mötədillik və tolerantlıq modeli ilə tanınır.
Yeni təyin olunan elçi BƏƏ-nin bu sahədə fəaliyyətini beynəlxalq tərəfdaşlıqların inkişafı, regional və qlobal konfranslarda, seminar və görüşlərdə iştirak, eləcə də ekstremizm və terrorla mübarizə üzrə beynəlxalq qərarların, xüsusilə BMT Təhlükəsizlik Şurasının qərarlarının icrasının izlənməsi yolu ilə dəstəkləyəcək.
Maqsud Kruz bildirib ki, o, beynəlxalq tərəfdaşlarla sıx əməkdaşlıq edərək BƏƏ-nin qabaqcıl təcrübəsini qlobal platformalarda paylaşmağa, ekstremizm və terrorla mübarizədə bilik və ən yaxşı təcrübələrin mübadiləsini genişləndirməyə çalışacaq.
Rəsmi dairələrin fikrincə, bu yeni vəzifə BƏƏ-nin institusional yanaşmasının davamıdır. Ölkə ekstremizm və terrora yalnız təhlükəsizlik prizmasından deyil, həm də onların ideoloji köklərinə və sosial dayaqlarına qarşı erkən mərhələdə mübarizə aparmaq strategiyasını izləyir.
Bu çərçivədə BƏƏ əvvəllər Tolerantlıq və Birgəyaşayış Nazirliyi yaradıb, Milli Tolerantlıq Proqramını həyata keçirib, Hedayah Center və Sawab Center kimi mərkəzlər təsis edib. Həmçinin 2019-cu il ölkədə “Tolerantlıq İli” elan olunub.
Xatırladaq ki, BƏƏ-nin təşəbbüsü ilə 2019-cu ildə Əhməd əl-Tayyib və Papa Fransisk arasında tarixi görüş keçirilib və nəticədə “İnsan Qardaşlığı Bəyannaməsi” qəbul olunub. Bu sənəd dinlərarası dialoq və ekstremizmə qarşı qlobal mübarizədə mühüm mərhələ kimi qiymətləndirilir.
