BAKI, TurkicWorld, Orxan Qədirzadə
Rusiya Ədliyyə Nazirliyi Almaniyanın “Deutsche Welle” media şirkətini ölkədə “arzuolunmaz təşkilatlar” siyahısına daxil edib.
TurkicWorld-un məlumatına görə, bu barədə Rusiya Ədliyyə Nazirliyinin rəsmi reyestrində dərc olunan məlumatda bildirilib.
Qeyd edək ki, bundan əvvəl Rusiya Dövlət Dumasının xarici müdaxilələrin araşdırılması üzrə komissiyasının sədri Vasili Piskaryov “Deutsche Welle”nin Rusiyaya qarşı “düşmən xarakterli antirusiya təbliğatının ön cəbhəsində yer aldığını” iddia edib.
Xatırladaq ki, 2022-ci ilin fevral ayının əvvəlində “Deutsche Welle”nin Rusiyada yayımı qadağan edilmişdi. Bu qərar Almaniyanın Rusiyanın dövlət telekanallarından birinə qarşı tətbiq etdiyi oxşar tədbirə cavab olaraq qəbul olunmuşdu.
Məlumata görə, Rusiyada bəzi xarici və beynəlxalq təşkilatlar milli təhlükəsizliyə təhdid hesab edildikləri əsas gətirilərək “arzuolunmaz təşkilatlar” reyestrinə salınır. Bu statusa malik qurumların fəaliyyətində iştirak edən şəxslər inzibati məsuliyyətə cəlb olunur və cərimələrlə üzləşir.
