BAKI, TurkicWorld
Türkiyənin hakim AK Partiyasının sözçüsü Ömər Çelik, ABŞ və İsrailin İrana qarşı həyata keçirdiyi hərbi əməliyyatları "ədalətsiz, qanunsuz və beynəlxalq hüquqa zidd" adlandırıb.
TurkicWorld xəbər verir ki, AK Parti Mərkəzi Qərar və İdarə Heyətinin (MKYK) iclasından sonra çıxış edən Çelik, Türkiyənin bu çətin məqamda qardaş İran xalqının yanında olduğunu bəyan edib.
Partiya sözçüsü hücumun diplomatik danışıqların davam etdiyi bir vaxtda baş verməsini kəskin tənqid edərək, bunu "diplomatiyanın məhv edilməsi" kimi qiymətləndirib. "Suveren bir dövlətin dövlət aparatını, dini və siyasi liderlərini hədəf almaq beynəlxalq nizamı dağıtmaq deməkdir. Rejim növü heç bir ölkəyə başqa bir dövlətə hücum etmək üçün subyektiv bəhanə verə bilməz," – deyə Çelik vurğulayıb. O, həmçinin İranın özünümüdafiə hüququndan istifadə edərkən qonşu ərəb ölkələrindəki ABŞ bazalarını vurmasını "səhv yanaşma" adlandıraraq, Tehranı regional müharibə riskinə qarşı ehtiyatlı olmağa çağırıb.
Ömər Çelik Türkiyənin prosesləri dörd əsas istiqamət üzrə – təhlükəsizlik, iqtisadi təsirlər, miqrasiya dalğası və xaricdəki vətəndaşların təxliyəsi üzrə yaxından izlədiyini bildirib. O qeyd edib ki, Türkiyə iqtisadiyyatı bu növ qlobal şoklara qarşı dözümlüdür və dövlət qurumları mümkün miqrasiya axınına qarşı tam koordinasiya olunmuş şəkildə hazırlıq görüb. Türkiyə tərəfi tərəfləri dərhal danışıqlar masasına qayıtmağa və bölgədəki yanğını daha da böyümədən söndürməyə çağırıb.
