Bakı, TurkicWorld
Cənubi Koreyanın "Jeju Air" aviaşirkəti Colanam-do əyalətindəki Muan hava limanında baş vermiş "Boeing 737-800" təyyarəsinin qəzaya uğraması nəticəsində həyatını itirənlərin ailələrinə dəstək göstərəcəyini bəyan edib.
TurkicWorld xəbər verir ki, şirkətin rəsmi saytında yerləşdirilən açıqlamada bu barədə məlumat verilib.
"Jeju Air" rəhbərliyi bildirib: "Şirkətimiz təcili cavab rejimində fəaliyyət göstərir. Həlak olanların ailələrinə yardım etmək üçün xüsusi qrup yaradılıb və onlara bütün zəruri dəstək göstəriləcək."
Son məlumata görə, qəza nəticəsində 85 nəfər həyatını itirib. Səlahiyyətlilərin sözlərinə görə, xilas edilən iki nəfər istisna olmaqla, təyyarədə olan 175 sərnişin və 6 ekipaj üzvünün böyük əksəriyyəti həlak olub.
Şirkət bəyanatında əlavə edib: "Muan hava limanında baş vermiş faciə ilə bağlı hər kəsdən üzr istəyirik. Bu hadisəyə maksimum dəstək göstəriləcək. Yaratdığımız narahatlıq üçün üzr istəyirik."
İlkin araşdırmalara əsasən, qəzanın səbəbi eniş qurğusundakı nasazlıq olub. Bu nasazlıq təyyarənin quşlarla toqquşmasından sonra yaranıb. Ekipaj təyyarəni təhlükəsiz şəkildə yerə endirməyə çalışsa da, sürəti azaltmaq mümkün olmayıb və təyyarə uçuş-enmə zolağının sonundakı konstruksiyaya çırpılaraq yanmağa başlayıb.
