Bakı. Trend:
"Baku Network" ekspert platformasında "Tofiq Abbasovla Dialoq" analitik videolayihəsinin növbəti buraxılışı yayımlanıb.
Trend xəbər verir ki, verilişin qonağı Əməkdar jurnalist, Azərbaycan Jurnalistlər Birliyinin sədri Elçin Şıxlı olub.
Bakı ilə İrəvan arasındakı normallaşma prosesini müzakirə edən E.Şıxlı vurğulayıb ki, Azərbaycan Ermənistanla uzunmüddətli sülh istəyir.
"Azərbaycan uzunmüddətli sülh və əməkdaşlıqda maraqlıdır, çünki biz qurmaq və yaratmaq istəyirik", – o bildirib.
E.Şıxlı Ermənistanda Azərbaycanla sülhə maraqlı olmayan müəyyən bir qrupun olduğunu və onların buna görə vəziyyəti qarışdırdığını qeyd edib.
"Əlbəttə, məğlubiyyətin acı həqiqətini qəbul etmək çətindir. Amma burada bir faktor var. Birinci Qarabağ müharibəsindən sonra 30 il ərzində, o cümlədən, ATƏT-in Minsk Qrupu və digər beynəlxalq strukturlar, Azərbaycana və azərbaycanlılara reallıqla barışmağı təlqin etməyə çalışdılar.
İndi düşünürəm ki, yəqin, Ermənistan tərəfinə də eyni şeylər deyilir. Amma burada bir fərq var. Biz təcavüzkar deyildik, bizim torpaqlarımız işğal olunmuşdu. Müharibə bizim ərazimizdə gedirdi", – o əlavə edib.
Verilişin tam buraxılışını təqdim edirik:
