Bakı. TurkicWorld:
Hazırda zəlzələ ilə əlaqədar Türkiyədə ancaq Azərbaycan və Flippindən gələn axtarış-xilasetmə qrupları fəaliyyətlərini davam etdirirlər.
TurkicWorld xəbər verir ki, bunu Türkiyənin xarici işlər naziri Mövlud Çavuşoğlu deyib.
Onun sözlərinə görə, 90 ölkədən 11 500-ə yaxın axtarış-xilasetmə heyəti gəlmişdi.
"İki ölkənin daha - Gürcüstan və Özbəkistanın heyətləri işlərini tamamladıqları üçün geri qayıdıblar. Hazırda ancaq Azərbaycan və Flippindən 700 nəfərlik heyət axtarış-xilasetmə işləri görür", - deyə nazir bildirib.
M.Çavuşoğlu qeyd edib ki, 27 ölkədən 30 səhra xəstəxanası göndərilmişdi: "Bunlardan bəziləri axtarış-xilasetmə heyəti ilə birgə gəlmişdi. Hazırda 10-u geri qayıdıb, 20-si fəaliyyətini davam etdirir".
Xatırladaq ki, fevralın 6-da Türkiyənin Kahramanmaraş vilayətinin Pazarcık rayonunda 7,7 bal, Elbistan rayonunda 7,6 bal gücündə iki zəlzələ baş verib. Dərinliyi 7 kilometr olan zəlzələ 10 vilayətdə ciddi dağıntılara səbəb olub. Zəlzələdən zərər çəkmiş 10 vilayətdə üç ay müddətinə fövqəladə vəziyyət rejimi elan olunub. Həmçinin Türkiyədə bir həftəlik matəm elan olunub.
