Bakı. TurkicWorld
Ankara Böyükşəhər Bələdiyyəsinin sədri Mansur Yavaş Cümhuriyyət Xalq Partiyasından (CHP) istefa verdiyini və bundan sonra siyasi fəaliyyətini müstəqil şəkildə davam etdirəcəyini açıqlayıb. Yavaşın istefası 23 sentyabr 2026-cı ildə açıqlanıb.
TurkicWorld xəbər verir ki, Mansur Yavaş qərarını ictimaiyyətə açıqlayarkən bunun ani və emosional addım olmadığını, uzun müddət düşündükdən sonra qəbul edildiyini bildirib. O, martın 19-dan başlayan və sonrakı dövrdə hüquqi və siyasi mübahisələrlə davam edən proseslərin Türkiyə siyasətində ciddi fikir ayrılıqları yaratdığını deyib.
Yavaş son dövrdə səsləndirdiyi fikirlərdən geri çəkilmədiyini və mövqeyinin dəyişmədiyini vurğulayıb. O, partiya mənsubiyyətini təmsil etdiyi siyasi qurumun nüfuzuna töhfə vermək və seçicilərin etimadını doğrultmaq məsuliyyəti kimi qiymətləndirdiyini bildirib.
Ankara Böyükşəhər Bələdiyyəsinin sədri fəaliyyəti dövründə ayrı-seçkiliyə yol verməyən, şəffaf və hesabatlı idarəçilik qurmağa çalışdığını deyib. Yavaş özünü heç vaxt siyasi partiyalardan üstün hesab etmədiyini də xüsusi vurğulayıb.
O, müxalifət daxilində davam edən fikir ayrılıqlarına toxunaraq, demokratik yolla hakimiyyət dəyişikliyinin müxalif qüvvələrin bir-biri ilə mübarizəsindən deyil, ortaq prinsiplər ətrafında əməkdaşlığından keçdiyini bildirib. Yavaş xüsusilə CHP daxilindəki hüquqi və siyasi mübahisələrin partiyada daha dərin parçalanmaya səbəb ola biləcəyini qeyd edib.
Yavaş partiya daxilində onun mövqeyi ilə bağlı narazılıq yaranacağı təqdirdə lazımi addımı atacağını daha əvvəl də bildirdiyini xatırladıb. O, son açıqlamalardan sonra CHP üzvlüyündən ayrılmaq və siyasi fəaliyyətini müstəqil davam etdirmək qərarına gəldiyini açıqlayıb.
Bələdiyyə sədri başqa siyasi partiyaya keçməyəcəyinə də işarə edib. O, seçicilərin səsi ilə əldə olunan vəzifənin onların razılıq vermədiyi başqa siyasi ünvana daşınmasını düzgün hesab etmədiyini bildirib və seçici iradəsinə sadiqliyin siyasətdə əsas prinsip olduğunu vurğulayıb.
Mansur Yavaş bundan sonra da Ankara Böyükşəhər Bələdiyyəsinin sədri vəzifəsini müstəqil şəkildə davam etdirəcəyini bildirib. O, siyasi baxışından və seçkilərdə ona səs verib-verməməsindən asılı olmayaraq bütün Ankara sakinlərinə eyni yanaşma ilə xidmət edəcəyini bəyan edib.
Yavaşın qərarından sonra Ankaranın bir sıra rayonlarının bələdiyyə sədrləri də CHP-dən ayrıldıqlarını açıqlayıblar. Son məlumatlara görə, Ayaş, Beypazarı, Elmadağ, Güdül, Kalecik, Şərəflikoçhisar, Nallıhan və Polatlı bələdiyyələrinin sədrləri partiyadan istefa veriblər.
