BAKI,TurkicWorld, Fərid Mikayılov
Türkiyə Prezidenti Rəcəb Tayyib Ərdoğan sabah Səudiyyə Ərəbistanına rəsmi səfər edəcək. Səfər Ankara ilə Ər-Riyad arasında son illər güclənən siyasi, iqtisadi və təhlükəsizlik əməkdaşlığının daha da dərinləşdirilməsi baxımından mühüm əhəmiyyət daşıyır.
TurkicWorld xəbər verir ki, Ərdoğan Səudiyyə Ərəbistanının paytaxtı Ər-Riyadda vəliəhd şahzadə və Baş nazir Məhəmməd bin Salman tərəfindən rəsmi mərasimlə qarşılanacaq.
Danışıqlar zamanı ikitərəfli münasibətlərin strateji gündəliyi, ticarət dövriyyəsinin artırılması, enerji və müdafiə sənayesi sahəsində əməkdaşlıq, eləcə də Yaxın Şərqdəki aktual proseslər müzakirə olunacaq.
Səfər çərçivəsində Türkiyə Ticarət Nazirliyi və Xarici İqtisadi Əlaqələr Şurasının (DEİK) təşkilatçılığı ilə Türkiyə–Səudiyyə Ərəbistanı Biznes Forumu keçiriləcək. Forumda qarşılıqlı investisiyaların genişləndirilməsi, iri infrastruktur layihələri və yeni maliyyə mexanizmləri gündəmdə olacaq.
Rəsmi məlumatlara əsasən, Türkiyə ilə Səudiyyə Ərəbistanı arasında ticarət dövriyyəsi son illərdə sabit artım nümayiş etdirir. 2024-cü ildə bu göstəricinin təxminən 8 milyard dollar səviyyəsində olduğu bildirilir. Türkiyənin ixracında ərzaq məhsulları, xalça, kimya sənayesi və tikinti materialları ön plandadır.
İki ölkə arasında müdafiə sənayesi sahəsində əməkdaşlıq da yeni mərhələyə keçib. Xüsusilə pilotsuz uçuş aparatları və müdafiə elektronikası üzrə imzalanmış sazişlər tərəfdaşlığın strateji xarakterini gücləndirib.
Ankara və Ər-Riyad eyni zamanda Fələstin məsələsi, Suriya, Sudan və Yəməndə sabitliyin bərpası kimi regional mövzularda koordinasiyalı mövqe nümayiş etdirir.
