BAKI, TurkicWorld, Nailə Babazadə
Sudanda sülhün bərpası və beynəlxalq səylərin əlaqələndirilməsi məqsədilə Misirdə keçirilən yüksək səviyyəli görüşdə Türkiyə müşahidəçi statusunda təmsil olunub.
TurkicWorld xəbər verir ki, Türkiyə Xarici İşlər Nazirliyindən alınan məlumata görə, Qahirədə Birləşmiş Millətlər Təşkilatı (BMT) ilə əməkdaşlıq çərçivəsində "Sudanda Sülh Təşəbbüsləri və Səylərin Koordinasiyasının Təkmilləşdirilməsinə dair Beşinci Məşvərət Zirvəsi" keçirilib. Bu diplomatik tədbirdə Türkiyəni xarici işlər nazirinin müavini, səfir Musa Kulaklıkaya təmsil edib.
Müşavirə zamanı Sudanda davam edən qarşıdurmaların dayandırılması üçün beynəlxalq birliyin koordinasiyalı hərəkət etməsinin vacibliyi vurğulanıb. İştirakçı tərəflər təcili atəşkəs rejiminin dəstəklənməsi, mülki şəxslərin qorunması və humanitar yardımların ehtiyacı olanlara maneəsiz çatdırılması barədə çağırışlar ediblər. Danışıqlarda Sudanın birliyi və ərazi bütövlüyünün qorunmasının zəruriliyi, habelə xalqın təhlükəsizlik və sabitlik gözləntilərini qarşılayacaq hərtərəfli siyasi prosesin həyata keçirilməsinə dair razılıq ifadə olunub.
Qeyd edək ki, bu kritik toplanışda Türkiyə ilə yanaşı ABŞ, Rusiya, Çin, Fransa, Böyük Britaniya, Səudiyyə Ərəbistanı, Qətər və BƏƏ kimi ölkələrin nümayəndələri də iştirak edib. Həmçinin Afrika Birliyi, Avropa Birliyi və Ərəb Liqası kimi beynəlxalq təşkilatlar da bu dialoq prosesinə qoşulublar. Sudanda sülh üçün keçirilən bu məclislərin ilki 2024-cü ilin iyununda Qahirədə başlamış, sonrakı mərhələlər isə Cibuti, Nuakşot və Brüsseldə davam etdirilmişdi.
