BAKI, TurkicWorld, Nailə Babazadə
Türkiyə Xarici İşlər Naziri Hakan Fidan, NATO Baş katibi Mark Rutte ilə Belçikanın paytaxtı Brüsseldə keçirilən NATO Xarici İşlər Nazirləri Toplantısının marjında görüşüb.
TurkicWorld xəbər verir ki, görüşdə əsasən Ukrayna ilə Rusiya arasında davam edən müharibənin sonlandırılması üçün görülən səylər müzakirə olunub. Hakan Fidan və Mark Rutte, müharibənin daha da uzanmaması üçün beynəlxalq əməkdaşlığın və diplomatik həll yollarının vacibliyini vurğulayıb.
Bundan əlavə, Qara Dənizin təhlükəsizliyi ilə bağlı məsələlər də gündəmə gətirilib. Bu çərçivədə regionda sabitliyin təmin edilməsi və NATO-nun bu sahədəki rolunun artırılması müzakirə edilib.
Görüşdə həmçinin, 2026-cı ilin iyul ayında Ankarada keçiriləcək NATO Zirvəsi üçün hazırlıqlar və zirvə öncəsi görülməsi gərəkən işlər haqqında da fikir mübadiləsi aparılıb. Zirvə toplantısının gündəminə qoyulacaq məsələlər və tədbirlərin təşkilatı məsələləri ön plana çıxıb.
Türkiyənin müdafiə sənayesinin NATO üzvlərinə verdiyi töhfələr də görüşdə müzakirə olunan digər mövzulardan biri olub. Hakan Fidan, Türk müdafiə sənayesinin beynəlxalq əməkdaşlıqda daha aktiv rol almasının əhəmiyyətini vurğulayıb və NATO müttəfiqləri ilə daha sıx əməkdaşlığın vacibliyini qeyd edib.
