BAKI, TurkicWorld, Fərid Mikayılov
Özbəkistan Prezidenti Şavkat Mirziyoyev Qazaxıstan Prezidenti Kasım-Jomart Tokayevə Özbəkistanın ən yüksək dövlət mükafatı olan Yüksək Dərəcəli Dostluq ordenini təqdim edib.
TurkicWorld xəbər verir ki, Mirziyoyev çıxışında bu jestin yalnız Tokayevə deyil, bütün Qazaxıstan xalqına olan dərin hörmətin ifadəsi olduğunu qeyd edib.
O, Qazaxıstan və Özbəkistan arasında dostluq və qonşuluq münasibətlərinin möhkəmlənməsində Tokayevin töhfəsini yüksək qiymətləndirib.
“Bu yüksək mükafat dostluq, sülh və hörmət ideallarını təcəssüm etdirir. Qazaxıstan və Özbəkistan arasındakı dostluq qiymətli sərvətdir, biz bunu qoruyur və inkişaf etdiririk” - deyə Mirziyoyev bildirib
Özbəkistan Prezidenti Şavkat Mirziyoyev Tokayevin rəhbərliyi ilə Qazaxıstanda həyata keçirilən islahatları, sosial-iqtisadi inkişafı və beynəlxalq sahədə əldə olunan uğurları yüksək qiymətləndirib.
