Bakı, TurkicWorld / Stilist Ayaz Este
Hər bir görüşün uğuru ilk təəssüratdan başlayır və bu təəssürat çox vaxt geyimlə bağlı olur. Düzgün seçilmiş stil yalnız peşəkarlıq nümayiş etdirmir, həm də güvən, ciddilik və səliqəliliyi göstərir. Bu məqalədə görüşlərdə uğur qazandıran bir neçə əsas geyim qaydasını nəzərdən keçirəcəyik.
Sadəlik
Çox vaxt sadə geyimlər daha zərif görünür və qarşı tərəfi diqqət yayındırmadan söhbətə fokuslanmağa imkan verir. Klasik kostyumlar, ağ köynəklər və neytral rənglər həm qadınlar, həm də kişilər üçün etibarlı seçimdir. Məsələn, tünd rəngli (qara, tünd göy və boz) pencəklər, minimal aksessuarlarla kombin edildikdə güclü təəssürat yaradır.
Rənglər
Görüşlərdə rəng seçimi əhəmiyyətli bir rol oynayır. Neytral və sakitləşdirici tonlar – boz, bej, açıq mavi – sakitlik və etibar hissi yaradır. Əgər qarşı tərəfdə enerjili və dinamik təəssürat yaratmaq istəyirsinizsə, qırmızı və ya bordo kimi daha cəsarətli rənglər seçə bilərsiniz. Bu rənglər qətiyyət və güvən simvoludur. Amma bu cür rəngləri geyimdə ölçülü şəkildə istifadə etmək vacibdir.
Keyfiyyət
Geyimlərin keyfiyyəti çox şey ifadə edir. Ucuz və ya uyğun olmayan geyimlər təsir yaratmaq yerinə sizi geri çəkə bilər. Yaxşı keyfiyyətli parçalar, xüsusilə pambıq, ipək və yun kimi təbii materiallar, görüşlərdə səliqəli və professional görünüşünüzü gücləndirir. Həmçinin geyimlərin təmiz, ütülənmiş və səliqəli görünməsi də mühüm detallardandır.
Uyğunluq
Hər bir görüş fərqli bir mühitdə baş tutur – bu səbəbdən geyim seçiminiz həmin mühitə uyğun olmalıdır. Rəsmi görüşlərdə daha ciddi geyimlər, qeyri-rəsmi görüşlərdə isə rahat, amma yenə də şık və səliqəli kombinlər seçilməlidir. Əsas olan, özünüzü geyimlərinizdə rahat hiss etməyinizdir – bu güvəninizi də artıracaq.
Aksesuar
Minimal və zərif aksesuarlar imicinizə son toxunuşu edir. Qol saatı, nazik zəncirlər və ya dəri kəmərlər – hər biri sadə, amma möhtəşəm görünüş yarada bilər. Çox böyük və ya parlaq aksesuarlardan qaçın, çünki bu, diqqəti geyimdən yayındıra bilər.
Ayaqqabılar – Son Toxunuş
Düzgün seçilmiş ayaqqabılar stilinizi tamamlayır. Kişilər üçün klassik dəridən hazırlanmış ayaqqabılar, qadınlar üçün isə rahat, amma şıq ayaqqabılar (dabanlı ayaqqabı və ya zərif baletkalar) uyğun seçim ola bilər. Ayaqqabılarınızın təmiz və yaxşı vəziyyətdə olmasına diqqət yetirin – bu, səliqəli görünüşün əsasını təşkil edir.
Yekunda qeyd etmək istərdim ki, geyimlər yalnız vizual təəssürat yaradır; düzgün münasibət və davranış isə uğurun əsasını təşkil edir.
