Bakı, TurkicWorld
Misirdəki Müsəlman Qardaşları (İxvan) təşkilatının Siyasi Bürosunun rəhbəri Dr. Helmi Əl-Qazzar Misir prezidenti Abdülfəttah əs-Sisinin Ankaraya səfərindən sonra Türkiyə ilə Misir arasında rəsmi yaxınlaşmanın başlamasını alqışlayıb.
Mövzu ilə bağlı BBC Arabic-ə verdiyi açıqlamada Dr. Qazzar, “Misir və Türkiyə kimi iki mühüm dövlətin yaxınlaşması hər iki ölkə xalqının xeyrinədir. Misir rejimi ilə siyasi fikir ayrılığımıza baxmayaraq, biz bu məsələ ilə bağlı ilk addımlardan etibarən bu yaxınlaşmanı dəstəkləmişik", - deyə qeyd edib.
Ankara ilə Qahirənin yaxınlaşması dövründə Müsəlman Qardaşlarının Türkiyədə məhdudiyyətlərə məruz qalması ilə bağlı şayiələri təkzib edən Dr. Qazzar, "Öhəmiyyətli bir ölkə olan Türkiyə, mənəvi və insani vəzifəsi əsasında siyasi liderlik rolunun fərqindədir",- deyə bildirib.
Türkiyənin qapılarını təkcə misirlilərə deyil, bütün məzlum insanlara açdığını vurğulayan Dr. Qazzar “Türkiyə eyni şəkildə uyğurları, çeçenləri və Serbiya ilə müharibə zamanı Bosniya və Herseqovina müsəlmanlarına da ev sahibliyi edib. Ona görə də bütün məzlumlara dəstək olan türk xalqının bu davranışını qəribə qarşılamağa ehtiyac yoxdur”,- deyə əlavə edib.
Təhlükəsizliklə bağlı atılan addımlar və təzyiqlər nəticə vermədi
Misirdəki vəziyyətin təkcə Müsəlman Qardaşları və Misir rejimi ilə məhdudlaşmadığını həmçinin ölkə daxilində və xaricində bütün partiyaları əhatə edəcək siyasi bir həll yolu axtardıqlarını söyləyən Dr.Qəzzar "Çünki təhlükəsizliklə bağlı atılan addımlar və təzyiqlər nəticə vermədi", -deyə əlavə edib.
Digər tərəfdən, Müsəlman Qardaşlarının lideri qütbləşməyə və sosial parçalanmaya gətirib çıxaracaq iqtidar mübarizəsi arxasınca qaçmadıqlarını da deyib.
Dr. Qəzzar həmçinin Misir qüvvələrinin ölkənin içində olduğu problemlərlə üzləşmək üçün birləşəcəyinə, məntiqin üstün gələcəyinə və onun fikrincə, tarixən uğursuz olan təhlükəsizliklə bağlı mövcud yanaşmalara son qoyulacağına ümid etdiyini bildirib.
Müsəlman Qardaşlar təşkilatı daxilindəki fikir ayrılığının sadəcə inzibati, idarəetmə qaydaların şərh edilməsi ilə bağlı bir fikir ayrılığı olduğunu və bu vəziyyətin aradan qalxdığını söyləyən Dr. Qazzar ,“Filan və ya filan qrup arasında həqiqi mənada bir rəqabət yoxdur. Onların heç biri prinsip və yanaşma baxımından fərqlənmir. Bu da İslamın düzgün yanaşmasıdır”,-deyə qeyd edib.
Bu, siyasətdən geri çəkilmək sayılmır
Müsəlman Qardaşlarının hakimiyyət uğrunda mübarizə aparmayacağını bildirən Dr. Qazzar "Lakin bu, siyasətdən tamamilə geri çəkilmək mənasına gəlmir", -deyə əlavə edib.
Siyasi fəaliyyətin təşkilati qaydaların bir hissəsi olduğunu vurğulayan Dr. Qəzzar “Çünki bu, Müsəlman Qardaşları və Əl-Əzhərin anladığı halı ilə İslamın bir hissəsidir”, -deyə əlavə edib.
Dr. Qazzar, həmçinin mərhum prezident Məhəmməd Mursiyə qarşı çevriliş zamanı Misir qüvvələri tərəfindən dağıdılan Rabaa meydanındaki oturaq aksiyaların tam şəkildə dinc həyata keçirildiyini, bunun silahlı nümayiş olması ilə bağlı deyilənlərin sadəcə böhtan və qara təbliğatdan başqa bir şey olmadığını da vurğulayıb.
Dr. Qəzzar əlavə edib ki, Müsəlman Qardaşlar xarici işğalçılardan başqa heç vaxt silaha sarılmayıb. O həmçinin Misirin zorakılığa və qana ehtiyacı olmadığını və istisnai məhkəmələrin ədaləti təmin edə bilməyəcəyini də əlavə edib.
O, bəyanatının sonunda “Müsəlman Qardaşlar”ın yaranmasının 100-cü ildönümü münasibəti ilə təşkilat bir konfrans keçirərək, özünü nəzərdən keçirəcəyini və buraxdığı səhvləri varsa onları açıqlayacağını deyib.
O, Türkiyə hökumətinə təşəkkür edib
Dr. Qazzar 2013-cü il hadisələrindən və mərhum prezident Məhəmməd Mursinin devrilməsindən sonra "Müsəlman Qardaşlar"ın üzvlərinə etdiyi ev sahibliyinə görə Türkiyə hökumətinə təşəkkür edib.
Türkiyədə Müsəlman Qardaşlar üzvlərinin heç bir təzyiqə məruz qalmadığını vurğulayan Dr. Qazzar “Ədliyyə orqanlarına gedən bəzi məhkəmə işlərində sənədlərlə bağlı yaranan inzibati vəziyyət istisna olmaqla, “Müsəlman Qardaşlar” üzvlərinə verilən vətəndaşlıqlar qanuni olaraq ləğv edilməyib. Həmin şəxslər də çatışmayan sənədlərini bərpa etdikdən sonra vətəndaşlıqlarını geri ala biliblər”,- deyə bildirib.
Digər tərəfdən Müsəlman Qardaşlarına yaxın bəzi sosial media hesabları prezident Rəcəb Tayyib Ərdoğanın Misirə səfərindən ardınca türk vətəndaşlığı aldıqdan sonra şərtlərə riayət etmədikləri müəyyən edilən İstanbuldaki bəzi yüksək səviyyəli təşkilat üzvlərinin vətəndaşlıqdan çıxarılmasına qərar verildiyini iddia edib.
Türkiyədə olduqları üçün özlərini güvəndə hiss etdiklərini deyən Dr. Qazzar, “Türkiyə rəsmiləri heç bir narahatedici açıqlama verməyib və Türkiyə bəzilərinin düşündüyü kimi banan ölkəsi deyil, bir hüquq ölkəsidir. Buna görə də Türkiyədə səlahiyyətli şəxslər qanuni olaraq buna layiq olanlara vətəndaşlıq verilməsinə hörmətlə yanaşırlar”, - deyə o bildirib.
Dr. Qazzar həmçinin təşkilatın Misir rejiminə “ölkədə siyasi məhbusların azad edilməsi müqabilində siyasi fəaliyyətdən əl çəkməyi” təklif etdiyi barədə xəbərləri təkzib edib.
