Bakı. TurkicWorld:
Azərbaycan-Avstriya parlamentlərarası əlaqələr üzrə işçi qrupu bəyanat yayıb.
TurkicWorld xəbər verir ki, bəyanatda deyilir:
“Azərbaycan-Avstriya parlamentlərarası əlaqələr üzrə işçi qrupu Avstriya Parlamentinin 19 oktyabr 2023-cü il tarixli birtərəfli, regionda baş verən hadisələri obyektiv əks etdirməyən, beynəlxalq hüquq normalarına və beynəlxalq aləmdə Avstriya Respublikasının neytral mövqeyinə zidd olan bəyanatına qəti etirazını bildirir və regionda etimad və sülh yaradıcı fəaliyyəti hədəf alan bu hərəkəti şiddətlə qınayır.
Qəbul edilən bəyanatda Azərbaycanın öz suveren ərazisində terrorçuluqla mübarizəsi, antiterror tədbirləri zamanı mülki əhalinin ziyan çəkməməsi, Qarabağın erməni əsilli sakinlərinin könüllü olaraq Ermənistana keçməsi, Qarabağı tərk etməyərək orda qalan insanlara Azərbaycanın hər cür yardım etməsi, reinterqasiya prosesi üçün Azərbaycanın xüsusi portal yaratması və Azərbaycanın Prezident Administrasiyasının reinteqrasiya üçün xüsusi plan bəyan etməsi ilə bağlı həqiqət və faktlar nəzərə alınmamış, regionda mövcud olmuş münaqişənin kökündə dayanan, Ermənistanın Azərbaycana qarşı ərazi iddiaları, onun ardınca ölkəmizə münasibətdə törədilmiş hərbi işğal və Azərbaycan əhalisinin etnik təmizləməyə məruz qalması öz əksini tapmamışdır.
18 oktyabr 2023-cü il tarixində Avstriya Parlamentində deputatlarla görüş zamanı bütün bu məsələlər və faktlar tərəfimizdən sübutlarla onların diqqətinə çatdırılmış və deputatları maraqlandıran bütün suallara cavab verilmişdir.
Azərbaycan-Avstriya parlamentlərarası əlaqələr üzrə işçi qrupu olaraq ölkəmizə qarşı nümayiş etdirilən bu ədalətsiz yanaşmanı qətiyyətlə rədd edirik. Hesab edirik ki, bu cür bəyanatlar Ermənistandakı revanşist qüvvələri Azərbaycana qarşı fəaliyyətlərə təhrik edir və heç bir halda Azərbaycanla Ermənistan arasında normallaşma prosesinə xidmət etmir”.
