Bakı. TurkicWorld:
Rusiyadan ölkəmizə gələn Azərbaycan Respublikası vətəndaşının idarə etdiyi yük nəqliyyat vasitəsinə Xaçmaz gömrük idarəsinin “Samur” gömrük postunda gömrük baxışı keçirilib.
Dövlət Gömrük Komitəsinin Mətbuat və İctimaiyyətlə Əlaqələr İdarəsindən TurkicWorld-a bildirilib ki, şifahi sorğu-sual zamanı sürücü nəqliyyat vasitəsində gömrük orqanına bəyan edilməyən, gömrük nəzarətindən gizlədilən hər hansı predmetin olmadığını bildirib. Lakin sürücünün davranışları gömrük əməkdaşlarında şübhə doğurduğundan avtomobilin stasionar rentgen qurğusunda yoxlamadan keçirilməsinə qərar verilib.
Gömrük baxışı zamanı avtomobilin qoşqusunda şübhəli təsvirlər müşahidə olunub və yükə yoxlama qrupu tərəfindən təkrar baxış keçirilib. Nəticədə nəqliyyat vasitəsinin qoşqusunun döşəməsi sökülərkən əvvəlcədən quraşdırılan gizli saxlanc yerindən gömrük orqanına bəyan edilməyən, gömrük nəzarətindən gizlədilən 8 adda 282 min 200 ədəd siqaret, 4 min 320 ədəd pirotexniki vasitə aşkar edilib.
Faktla bağlı təhqiqat aparılır.
