BAKI,TurkicWorld,Yusif Şərifzadə
Avropa İttifaqı Rusiyanın Ukraynaya qarşı müharibəsi ilə əlaqədar Rusiyaya qarşı 21-ci sanksiyalar paketini təsdiqləyib. Yeni məhdudiyyətlər maliyyə sektoru, enerji gəlirləri, neft ticarəti, "kölgə donanması", hərbi-sənaye kompleksi və kriptovalyuta şəbəkələrini əhatə edir.
TurkicWorld xəbər verir ki, yeni paket çərçivəsində 170 hüquqi şəxs və 48 fiziki şəxs olmaqla ümumilikdə 218 yeni sanksiya tətbiq edilib. Bununla da Avropa İttifaqının sanksiya siyahısında olan şəxslərin və qurumların sayı təxminən 3 minə çatıb.
Maliyyə sektoru
Yeni paketə əsasən, 94 Rusiya maliyyə institutunun aktivləri dondurulub. Daha 33 Rusiya bankına qarşı SWIFT beynəlxalq ödəniş sistemindən ayrılmanı da əhatə edən əməliyyat qadağaları tətbiq olunub.
Sanksiyalar Monqolustan, Qırğızıstan və Hindistanda fəaliyyət göstərən bəzi banklara, həmçinin Gürcüstan, Panama, Marşall adaları, Belarus və Birləşmiş Ərəb Əmirliklərində yerləşən 14 kriptovalyuta platformasına da şamil edilib.
Neft və "kölgə donanması"
Aİ Rusiya nefti üçün qiymət tavanını növbəti 12 ay ərzində bir barel üçün 44,10 ABŞ dolları səviyyəsində saxlayıb.
Bundan başqa, Rusiyanın sanksiyalardan yayınmaq üçün istifadə etdiyi iddia olunan "kölgə donanması"na məxsus daha 41 gəmi sanksiya siyahısına daxil edilib. Beləliklə, siyahıya salınan gəmilərin ümumi sayı 670-i keçib.
Yeni qaydalara əsasən, Aİ ölkələri saxlanılan "kölgə donanması" gəmilərinin daşıdığı yükləri müsadirə edib sata biləcəklər.
Mayeləşdirilmiş təbii qaz (LNG)
Paketdə Rusiyaya məxsus LNG tankerlərinin satışı barədə məcburi bildiriş mexanizmi də nəzərdə tutulur.
2022-ci il fevralın 24-dək bağlanmış müqavilələr üzrə Aİ şirkətlərinə Rusiya LNG-sini üçüncü ölkələrə ötürməyə bir illik istisna verilib.
Eyni zamanda, Avropa İttifaqının Rusiya LNG-sinin idxalına qoyduğu qadağanın 2027-ci il 1 yanvar tarixindən qüvvəyə minəcəyi təsdiqlənib.
Hərbi-sənaye kompleksi
Rusiyanın hərbi-sənaye kompleksi ilə əlaqəli daha 56 hüquqi və fiziki şəxs sanksiya siyahısına daxil edilib.
Onlardan 37-si uzaqmənzilli "Garpiya" pilotsuz uçuş aparatlarının istehsalı ilə əlaqələndirilir.
Bundan əlavə, Çin (o cümlədən Honq Konq), Hindistan, Qazaxıstan, Qırğızıstan, Türkiyə və Birləşmiş Ərəb Əmirliklərində fəaliyyət göstərən 51 şirkət ikili təyinatlı məhsullar və texnologiyaların ixracına qoyulan məhdudiyyətlər siyahısına əlavə olunub.
Digər tədbirlər
Yeni paket mis, nikel və qurğuşun filizlərinin, sink, xrom oksidlərinin, şüşə məmulatlarının, imitasiya mirvarilərinin və avtomobil hissələrinin idxalına əlavə məhdudiyyətlər tətbiq edir.
Sanksiyalar Rusiyanın qızıl və almaz ixracı ilə əlaqəli şirkətləri və şəxsləri, həmçinin Rusiya təbliğatını yaymaqda ittiham olunan səkkiz nəfəri də əhatə edir.
Aİ, həmçinin Ukraynada döyüşmüş Rusiya hərbçilərinin üzv dövlətlərə girişinin məhdudlaşdırılması üçün yeni mexanizmin yaradılması barədə razılığa gəlib.
Bununla yanaşı, Yaponiya üçün "Saxalin-2" layihəsi üzrə neft və LNG istisnaları, eləcə də Cənubi Koreya üçün LNG istisnası 2028-ci il 31 mart tarixinədək uzadılıb.
