Bakı.TurkicWorld:
Qazaxıstan və Səudiyyə Ərəbistanı Jetısu vilayətində külək elektrik stansiyası tikəcək.
TurkicWorld xəbər verir ki, bu barədə razılaşma Qazaxıstan prezidenti Kasım-Jomart Tokayevin Səudiyyə Ərəbistanının energetika naziri Əbdüləziz bin Salman Əl Səud ilə görüşü zamanı əldə edilib.
Məlumata əsasən, görüşdə Qazaxıstan və Səudiyyə Ərəbistanı arasında enerji və investisiya əməkdaşlığının inkişaf perspektivləri müzakirə edilib.
Qazaxıstan prezidenti Tokayev qeyd edib ki, Qazaxıstan-Səudiyyə münasibətləri indiyədək ən yaxşı səviyyəsinə çatıb. O, Səudiyyə Ərəbistanının vəliəhd şahzadəsi və baş naziri Məhəmməd bin Salman Əl Səud ilə əldə etdiyi razılaşmaların bütün sahələrdə ikitərəfli əməkdaşlığa güclü təkan verdiyini vurğulayıb.
Bundan əlavə, iclasda iştirak edən Səudiyyə Ərəbistanının ACWA sədri Məhəmməd Abunayyan da Jetısu vilayətində 1 GVt gücündə külək elektrik stansiyasının tikintisi üzrə birgə investisiya layihəsinin perspektivləri, eləcə də ölkə ilə yaşıl enerji sahəsində əməkdaşlıq planları barədə danışıb.
Daha sonra Qazaxıstan və Səudiyyə Ərəbistanı hökumətləri külək elektrik stansiyasının tikintisi üzrə birgə layihənin həyata keçirilməsinə dair saziş imzalayıblar.
