Bakı, TurkicWorld
Azərbaycan tərəfindən sentyabrın 3-də COP29-a sədrliyinin təşəbbüsü kimi təqdim olunan "Bakı Qlobal İqlim Şəffaflığı Platforması (BTP)" inkişaf edən ölkələrin ehtiyaclarını qarşılayır və güclü şəffaflıq sistemlərinin yaradılmasına yönəlib.
TurkicWorld xəbər verir ki, bu barədə Braziliyanın ekologiya və iqlim dəyişikliyi üzrə nazir müavini Andre Korrera Bakıda keçirilən iqlim şəffaflığı məsələlərinə dair yüksək səviyyəli dialoqda onlayn çıxışında bildirib.
"Bu fürsətdən istifadə edərək, potensial və texniki ehtiyaclarda olan boşluqları aşkar etmək və aradan qaldırmaq, eyni zamanda, qarşılıqlı etimadı və əməkdaşlığı gücləndirmək lazımdır", - o qeyd edib.
Onun sözlərinə görə, qlobal şəffaflıq sisteminin qəbul edilməsi iqlim dəyişikliyi ilə mübarizədə yeni bir dövrün başlanğıcıdır.
"Bu dəyişiklik transformasiya xarakterlidir və ölkələr arasında əməkdaşlığı ön planda tutmağı təşviq edir", - Korrera əlavə edib.
Qeyd edək ki, 29-cu BMT İqlim Dəyişiklikləri Konfransının (COP29) sədri olaraq Azərbaycan bu gün "Bakı Qlobal İqlim Şəffaflığı Platforması"nı (Baku Global Climate Transparency Platform/BTP) təqdim edib.
"İqlim şəffaflığına dair Yüksək Səviyyəli Dialoq" zamanı COP29 prezidenti Muxtar Babayev bildirib ki bu platforma qlobal icmanı iqlim vəziyyətinin yaxşılaşdırılması istiqamətində şəffaflığı artırmaq məqsədini güdür.
Xatırladaq ki, BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyası bu ilin noyabrında Azərbaycanda keçiriləcək. Bununla bağlı qərar ötən il dekabrın 11-də Dubayda keçirilən COP28 plenar iclasında qəbul edilib. İki həftə ərzində dünyanın mərkəzinə çevrilən Bakı 70-80 minə yaxın xarici qonaq qəbul edəcək.
Birləşmiş Millətlər Təşkilatının İqlim Dəyişikliyi üzrə Çərçivə Konvensiyası 1992-ci ilin iyununda Rio-de-Janeyroda keçirilən Yer Sammitində insanın iqlim sisteminə təhlükəli müdaxiləsinin qarşısını almaq üçün imzalanmış sazişdir. "COP" (Conference of Parties) abbreviaturası İqlim Dəyişikliyi üzrə Çərçivə Konvensiyasının icrasına nəzarət edən ən yüksək qanunverici orqan olan "Tərəflərin Konfransı" mənasını verir.
Konvensiyada 198 ölkə iştirak edir. Tərəflər başqa cür razılaşmırsa, COP hər il keçirilir. İlk COP tədbiri 1995-ci ilin martında Berlində baş tutdu və onun katibliyi Bonnda yerləşir.
