Birlashgan Millatlar Tashkiloti Xotin-qizlarni kamsitishning barcha shakllariga barham berish bo‘yicha qo‘mitasining 81-sessiyasi 2022 yil 7 fevralda gibrid shaklda boshlandi va 25 fevralgacha davom etadi.
Sessiyada Xotin-qizlarni kamsitishning barcha shakllariga barham berish to‘g‘risidagi konvensiya qoidalarini bajarilishida erishilgan natijalarni muhokama qilish belgilangan. Mazkur Konvensiya BMT Bosh Assambleyasi tomonidan 1979 yil 18 dekabrda qabul qilingan bo‘lib, O‘zbekiston ushbu Konvensiyaga 1995 yil 6 mayda qo‘shilgan.
Sessiyada 15-16 fevral kunlari O‘zbekiston Respublikasining Oltinchi davriy ma’ruzasi ko‘rib chiqiladi. Shu munosabat bilan BMT qo‘mitasi sessiyasida Oliy Majlis Qonunchilik palatasi Spikerining birinchi o‘rinbosari, Inson huquqlari bo‘yicha O‘zbekiston Respublikasi Milliy markazi direktori Akmal Saidov boshchiligidagi mamlakatimiz delegatsiyasi onlayn ishtirok etmoqda.
Inson huquqlari bo‘yicha O‘zbekiston Respublikasi Milliy markazi tomonidan Konvensiya qoidalarini amalga oshirish doirasida tayyorlangan Oltinchi davriy hisobot 2016 yildan hozirgi kungacha bo‘lgan davrni o‘z ichiga olgan. Ushbu ma’ruzani tayyorlashda 30 dan ortiq davlat organi va 20 dan ziyod fuqarolik jamiyati instituti ishtirok etgan.
Oltinchi davriy hisobotda Konvensiya qoidalarining moddama-modda amalga oshirilishi, O‘zbekiston qonunchiligiga mazkur yo‘nalishda kiritilgan so‘nggi o‘zgarishlar, xotin-qizlarning mavqeini yuksaltirish borasida erishilgan yutuqlar haqida batafsil ma’lumot berilgan. Xususan, xotin-qizlarni kamsitmaslik sohasidagi davlat siyosatining amalga oshirilishi, O‘zbekiston hukumati tomonidan xotin-qizlarning jamiyatdagi mavqeini kuchaytirish, erkaklar va ayollar o‘rtasida amalda tenglikni o‘rnatishni jadallashtirish, xotin-qizlarga nisbatan jamiyatdagi noto‘g‘ri qarashlarga barham berish, xotin-qizlar savdosining barcha shakllariga va xotin-qizlardan fohisha sifatida foydalanishga chek qo‘yish, nikohga oid masalalar va oilaviy munosabatlarda, siyosiy faoliyat va jamiyat hayotida, ta’lim, bandlik, sog‘liqni saqlash, ijtimoiy-iqtisodiy, xalqaro hamkorlik sohalarida xotin-qizlarni kamsitishga yo‘l qo‘ymaslik borasida amalga oshirilayotgan chora-tadbirlar haqidagi ma’lumotlar qamrab olingan.
BMT Xotin-qizlarni kamsitishning barcha shakllariga barham berish bo‘yicha qo‘mitasining 81-sessiyasida Gabon, Panama, Senegal, Uganda, Domnikan Respublikasi va Livan davlatlarining bu boradagi davriy ma’ruzalari ham muhokama qilinadi.
Qayd etish kerak, qo‘mita Xotin-qizlarni kamsitishning barcha shakllariga barham berish to‘g‘risidagi konvensiya qoidalari bajarilishini monitoring qilish bilan shug‘ullanadi. bugungi kunda 18 nafar mustaqil ekspert mazkur qo‘mitaning a’zosi hisoblanadi.
Sessiya yakunida davriy hisobotni ko‘rib chiqish yakunlari yuzasidan tegishli davlatlarga taklif va tavsiyalar taqdim etiladi.
M.Komilova, O‘zA