BAKI,TurkicWorld,Yusif Şərifzadə
İran ABŞ-nin dəniz blokadasını və İran gəmilərinə qarşı təzyiqləri davam etdirəcəyi təqdirdə, ABŞ hərbi gəmilərinə qarşı daha ağır və genişmiqyaslı zərbələr endiriləcəyini açıqlayıb. Xəbərdarlıq ABŞ qüvvələrinin üç İran neftdaşıyan gəmisinə zərbə endirdiyini bildirməsindən sonra səslənib.
TurkicWorld xəbər verir ki, İran Silahlı Qüvvələrinin vahid komandanlıq strukturu olan Xatəmül-Ənbiya Mərkəzi Qərargahının sözçüsü ABŞ-nin dəniz blokadasını və “İran gəmilərinə qarşı təqibi” davam etdirməsinin yeni cavab zərbələrinə səbəb ola biləcəyini bildirib.
İran dövlət televiziyasının yaydığı açıqlamada ABŞ hərbi gəmilərinə qarşı zərbələrin daha sərt xarakter daşıya və daha geniş ərazilərə yayıla biləcəyi vurğulanıb.
Açıqlama ABŞ Mərkəzi Komandanlığının İranın üç neftdaşıyan gəmisinə zərbə endirdiyini bildirməsindən bir neçə saat sonra verilib.
ABŞ tərəfi həmin zərbələri İran İnqilab Keşikçiləri Korpusunun iki ABŞ hərbi gəmisinə ballistik raketlərlə hücumuna cavab kimi təqdim edib.
İran isə ABŞ-nin dəniz blokadasını və İran gəmilərinə qarşı hərəkətlərini münaqişənin daha da genişlənməsi təhlükəsi yaradan addımlar kimi qiymətləndirir.
