BAKI,TurkicWorld,Yusif Şərifzadə
ABŞ Mərkəzi Komandanlığı İranın üç xam neft daşıyan gəmisinə zərbə endirdiyini açıqlayıb. Vaşinqton bu addımın İran İnqilab Keşikçiləri Korpusunun iki ABŞ hərbi gəmisinə ballistik raketlərlə hücumundan sonra həyata keçirildiyini bildirib.
TurkicWorld xəbər verir ki, ABŞ Mərkəzi Komandanlığının açıqlamasına görə, ABŞ qüvvələri bu gün İranın üç xam neft daşıyan gəmisini vurub.
Bu açıqlamadan əvvəl İran mediası Xark adası yaxınlığında İran neft tankerinin ABŞ raketlərinin hücumuna məruz qaldığını bildirmişdi.
Mərkəzi Komandanlıq bildirib ki, zərbələr İran İnqilab Keşikçiləri Korpusunun regional sularda patrul xidməti həyata keçirən iki ABŞ hərbi gəmisinə ballistik raketlər atmasından sonra endirilib.
ABŞ Mərkəzi Komandanlığının komandanı Bred Kuper İran İnqilab Keşikçiləri Korpusuna müraciətlə bildirib ki, ABŞ gəmilərinə hücum ediləcəyi təqdirdə İranın iqtisadi itkiləri daha da artırılacaq.
Kuperin sözlərinə görə, iki ABŞ gəmisinə atəş açılmasına cavab olaraq üç İran neftdaşıyan gəmisinə zərbə endirilib.
Hadisə ABŞ ilə İran arasında hərbi qarşıdurmanın enerji infrastrukturu və neft daşımalarına da yayılması ilə bağlı narahatlıqları artırıb.
