BAKI,TurkicWorld, VOA Analitik Təhlil Mərkəzi
Efiopiyanın milli valyutası birr ABŞ dolları qarşısında dəyər itirməkdə davam edir. Mərkəzi bankın ilin əvvəlindən valyutanı dəstəkləmək üçün təxminən 2,2 milyard dollar xərcləməsinə baxmayaraq, birr dollar qarşısında rekord həddə yaxınlaşıb.
“Bloomberg”in məlumatına görə, birr ilin əvvəlindən təxminən 3,2 faiz ucuzlaşıb və dolların məzənnəsi 162 birrə yaxınlaşıb. Paralel bazarda isə dollar təxminən 180 birrə satılır ki, bu da rəsmi məzənnədən təxminən 15 faiz yüksəkdir.
Valyutaya təzyiqin əsas səbəbləri arasında xarici valyuta çatışmazlığı, neft və gübrə idxalının bahalaşması və cari hesab kəsiri göstərilir. Son valyuta hərracında dollar almaq üçün tələbin bankın təklif etdiyi məbləğdən dörd dəfə çox olması da böhranın miqyasını göstərib.
Mərkəzi Bankın müdaxilələri ölkənin valyuta ehtiyatlarına dair narahatlıqları artırır. Beynəlxalq Valyuta Fondunun iyul ayında açıqladığı hesablamaya görə, Efiopiyanın xarici valyuta ehtiyatları təxminən 5,9 milyard dollar təşkil edir.
Analitiklər birrin yaxın aylarda daha da zəifləyə biləcəyini istisna etmirlər. Bəzi proqnozlarda ilin sonuna dolların 163 birrə çatacağı, digər qiymətləndirmələrdə isə məzənnənin 185-195 birr aralığına yüksələ biləcəyi bildirilir.
