BAKI,TurkicWorld,Yusif Şərifzadə
Birləşmiş Millətlər Təşkilatının Qaçqınlar üzrə Ali Komissarlığı İsrailin aylarla davam edən hava zərbələri və bombardmanları nəticəsində Livan daxilində yaşayış yerlərini tərk etmək məcburiyyətində qalan təxminən 860 min nəfərin öz doğma bölgələrinə qayıtdığını bildirib. Bununla belə, qurum Livandakı humanitar böhranın başa çatmadığı barədə xəbərdarlıq edib.
TurkicWorld xəbər verir ki, BMT-nin Qaçqınlar üzrə Ali Komissarlığının çərşənbə axşamı yaydığı məlumata əsasən, təxminən 360 min nəfər hələ də öz yaşayış yerlərinə qayıda bilməyib. Onlardan azı 22 min nəfər müvəqqəti kollektiv sığınacaqlarda yaşayır, digərləri isə qohumlarının yanında və ya həddindən artıq sıx məskunlaşmış kirayə mənzillərdə qalırlar.
BMT qurumu atəşkəslə bağlı razılaşmaların elan edilməsinə baxmayaraq, Livanın cənubunda yeni İsrail hava zərbələrinin əhalinin yenidən köç etməsinə səbəb olduğunu bildirib. Həftə sonu həyata keçirilən hücumlardan sonra bəzi ailələr təhlükəsizlik səbəbindən yaşayış yerlərini yenidən tərk etmək məcburiyyətində qalıblar.
Qaçqınlar üzrə Ali Komissarlıq Livanda təhlükəsizlik vəziyyətinin hələ də kövrək olduğunu vurğulayıb. Qurumun məlumatına görə, yüz minlərlə insanın ərzaq, yaşayış yeri, tibbi yardım və digər əsas ehtiyaclarının ödənilməsi üçün humanitar dəstəyə ehtiyacı qalır.
İsrailin bu ilin əvvəlində Livana hərbi müdaxiləsi qarşıdurmanın ən gərgin dövründə ölkə daxilində bir milyondan çox insanın yaşayış yerindən didərgin düşməsinə səbəb olub.
BMT bildirir ki, döyüşlərin şiddəti əvvəlki dövrlə müqayisədə azalsa da, davam edən hava zərbələri insanların həyatını təhlükə altında saxlayır. Hərəkət məhdudiyyətləri və hərbi fəaliyyət də əhalinin doğma yaşayış məntəqələrinə təhlükəsiz qayıdışını çətinləşdirir.
Bununla yanaşı, partlamamış hərbi sursatların yaratdığı təhlükə Livanın cənubunda və Bəqa vadisinin böyük hissəsində ciddi problem olaraq qalır. BMT-nin qiymətləndirməsinə görə, bu amillər münaqişədən zərər çəkmiş əhali üçün davamlı və təhlükəsiz həll yollarının yaradılmasına mane olur.
