BAKI,TurkicWorld,Yusif Şərifzadə
İran Silahlı Qüvvələri ABŞ-nin gəmilərin Hörmüz boğazından adi qaydada keçməsi ilə bağlı açıqlamalarını rədd edib. Tehran boğazdan heç bir gəminin İranın icazəsi və nəzarəti olmadan təhlükəsiz şəkildə keçə bilməyəcəyini bildirib.
TurkicWorld xəbər verir ki, İranın Xatəmül-Ənbiya Mərkəzi Qərargahının sözçüsü Hörmüz boğazının əvvəlki kimi İran İslam Respublikasının tam idarəçiliyi və nəzarəti altında olduğunu açıqlayıb. İran tərəfi ABŞ-nin boğazdakı gəmi hərəkətinin adi qaydada davam etməsi barədə iddialarını əsassız adlandırıb.
Qərargahın açıqlamasına görə, heç bir ticarət gəmisi və ya neft daşıyan gəmi İran Silahlı Qüvvələrinin icazəsi və nəzarəti olmadan Hörmüz boğazından təhlükəsiz keçə bilməz. İran bundan əvvəl də boğazdan keçən gəmilərin müəyyən edilmiş hərəkət yollarından istifadə etməli və İran qüvvələrindən icazə almalı olduğunu bildirmişdi.
Tehranın son açıqlaması Hörmüz boğazına nəzarətlə bağlı ABŞ və İran arasında fikir ayrılığının daha da dərinləşdiyini göstərir. Vaşinqton boğazda sərbəst gəmiçiliyin təmin edildiyini bildirsə də, İran bu iddianı qəbul etmir və strateji su yolunun öz nəzarətində olduğunu vurğulayır.
Hörmüz boğazı dünya enerji daşımaları baxımından mühüm əhəmiyyət daşıyır. Bölgədəki hərbi gərginlik və gəmiçiliyin təhlükəsizliyi ilə bağlı qeyri-müəyyənlik qlobal neft və qaz daşımalarına təsir göstərməkdə davam edir.
