BAKI,TurkicWorld,Yusif Şərifzadə
Dəniz təhlükəsizliyi üzrə analitik Aaron Kennedi bildirib ki, hazırda İran Hörmüz boğazı vasitəsilə Fars körfəzinə daxil olan və oradan çıxan gəmilərə nəzarət edir.
TurkicWorld xəbər verir ki, beynəlxalq məsləhət şirkəti Control Risks-in dəniz kəşfiyyatı və təhlükəsizlik üzrə analitiki Aaron Kennedi bu barədə Əl-Cəzirə telekanalına müsahibəsində danışıb.
Onun sözlərinə görə, ABŞ və İsrailin İrana zərbələr endirməsindən sonra Hörmüz boğazında yaranmış vəziyyət dəyişməyib.
Kennedi iddia edib ki, İran Fars körfəzinə hansı gəmilərin daxil olub-çıxacağını müəyyənləşdirir və Tehranın razılığı olmadan hərəkət etməyə çalışan gəmiləri hədəfə alır.
Analitik qeyd edib ki, Hörmüz boğazında iki əsas gəmiçilik marşrutu mövcuddur. Onun sözlərinə görə, İranın nəzarətində olan şimal dəhlizi ABŞ Hərbi Dəniz Qüvvələrinin blokadası altındadır və bu marşrut üzrə ticarət həyata keçirilmir.
Kennedi əlavə edib ki, Omanın sahil xətti boyunca uzanan cənub dəhlizi əvvəlki marşrutdan fərqlənir. O bildirib ki, ABŞ bu marşrutdan istifadə edən gəmilərə müəyyən səviyyədə mühafizə təmin etsə də, bunun İranın mümkün hücumlarının qarşısını almaq üçün kifayət etmədiyini düşünür.
Qeyd edək ki, bu açıqlamalar Aaron Kennedinin qiymətləndirmələridir və müstəqil mənbələr tərəfindən təsdiqlənməyib.
