BAKI,TurkicWorld,Yusif Şərifzadə
İtaliyanın müdafiə naziri Quido Krosetto ölkənin Körfəz regionuna hərbi qüvvələr göndərməsi ilə bağlı müxalifətin tənqidlərini rədd edərək, missiyanın hüquqi və əməliyyat çərçivəsinin tam şəffaf şəkildə açıqlandığını bildirib.
TurkicWorld xəbər verir ki, İtaliya Müdafiə Nazirliyinin məlumatına əsasən, mart ayından etibarən Səudiyyə Ərəbistanı, Küveyt və Bəhreynə təxminən 400 nəfərlik Hərbi Hava Qüvvələri kontingenti göndərilib.
İtaliyanın mərkəz-sol Demokrat Partiyasının deputatları hökuməti bu missiya üçün parlamentdən lazımi icazə almamaqda ittiham ediblər. Onların fikrincə, Səudiyyə Ərəbistanına qüvvə göndərilməsi xarici hərbi əməliyyatlarla bağlı təsdiqlənmiş mandatın əhatə dairəsinə daxil deyil.
Baş nazir Corcia Meloninin rəhbərlik etdiyi İtaliya Qardaşları Partiyasının üzvü olan Quido Krosetto isə bu ittihamları qəbul etməyərək bildirib ki, missiyanın hüquqi və əməliyyat əsasları parlamentə və ictimaiyyətə maksimum şəffaflıqla təqdim olunub.
İtaliya hökuməti ABŞ və İsrailin İrana endirdiyi zərbələrdən sonra İranın cavab hücumlarına məruz qalan Körfəz ölkələrinə dəstəyini ifadə edib.
Rəsmi Roma bəyan edib ki, bölgədəki tərəfdaş ölkələr hava hücumundan müdafiə və pilotsuz uçuş aparatlarına qarşı mübarizə sahəsində dəstək üçün müraciət ediblər.
