BAKI,TurkicWorld,Yusif Şərifzadə
İran Hörmüz boğazını gələcək mümkün danışıqlarda ən mühüm strateji təzyiq vasitələrindən biri hesab edir. Bu fikri Böyük Britaniyanın Bat Universitetinin təhlükəsizlik üzrə baş dosenti Patrik Buri səsləndirib.
TurkicWorld xəbər verir ki, Patrik Burinin sözlərinə görə, Tehran Hörmüz boğazını daha geniş təhlükəsizlik və siyasi məqsədlərə nail olmaq üçün güclü danışıq aləti kimi qiymətləndirir.
Analitik bildirib ki, İran bu boğaz üzərində "çox güclü strateji rıçağa" malik olduğunu anlayır. Onun fikrincə, hərbi baxımdan İran ABŞ-ın regiondakı müttəfiqlərinə nisbətən daha aşağı xərclə ciddi təzyiq göstərə biləcək imkanlara sahibdir.
Buri qeyd edib ki, Tehranın mövqeyi böyük ehtimalla ondan ibarət olacaq ki, Hörmüz boğazı ilə bağlı hər hansı razılaşma yalnız İranın daha geniş təhlükəsizlik narahatlıqlarını əhatə edən ümumi razılaşmanın tərkib hissəsi ola bilər. Buraya sanksiyalar və İranın nüvə proqramı ilə bağlı məsələlər də daxildir.
Onun sözlərinə görə, İran Hörmüz boğazını danışıqlarda istifadə edə biləcəyi bir neçə mühüm rıçaqdan biri hesab edir və bu məsələlər həll olunmadan hər hansı razılaşmanı qəbul etməsi çətin görünür.
İran rəsmiləri analitikin bu qiymətləndirməsi ilə bağlı hələlik rəsmi açıqlama verməyiblər.
