BAKI,TurkicWorld,Yusif Şərifzadə
ABŞ-ın İrana qarşı yeni zərbələri fonunda qlobal neft bazarında qiymət artımı davam edib. Brent markalı neftin qiyməti son həftələrin ən yüksək göstəricilərindən birinə çatıb.
TurkicWorld xəbər verir ki, Brent markalı neft fyuçerslərinin qiyməti 5 faiz artaraq bir barel üçün 87,49 dollara yüksəlib.
Bu göstərici iyunun 12-dən bəri ən yüksək səviyyə hesab olunur. Bununla belə, qiymətlər müharibənin başlanmasından sonra qeydə alınan ən yüksək həddən hələ də aşağıdır.
Neft bazarında bahalaşma bundan əvvəl də müşahidə olunub. Bazar ertəsi günü Brent neftinin qiyməti 9 faizdən çox artmışdı.
Qiymət artımının əsas səbəblərindən biri ABŞ-ın İrana qarşı həyata keçirdiyi yeni hərbi zərbələr fonunda atəşkəsin gələcəyi ilə bağlı narahatlıqların artmasıdır.
Analitiklər hesab edirlər ki, ABŞ və İran arasında gərginliyin yenidən yüksəlməsi enerji təchizatında riskləri artırır və bu vəziyyət qlobal inflyasiya təzyiqlərini gücləndirə bilər.
Hörmüz boğazı ətrafında yaranan qeyri-müəyyənlik də enerji bazarlarında əsas narahatlıq mənbələrindən biri olaraq qalır. Dünya neft və qaz daşımalarının mühüm hissəsi bu strateji su yolundan keçir.
