BAKI,TurkicWorld Orxan Qədirzadə
İran ali rəhbəri Ayətullah Əli Xameneinin çoxgünlük dəfn mərasimləri ilə əlaqədar ABŞ ilə Qətərdə aparılan dolayı danışıqları müvəqqəti dayandırıb.
Məlumata görə, Qətərin vasitəçiləri məsləhətləşmələrin matəm mərasimləri başa çatdıqdan dərhal sonra bərpa olunacağını bildiriblər.
Bu arada Tehran xarici nümayəndə heyətlərinin qəbuluna hazırlaşır. İran Xarici İşlər Nazirliyinin sözçüsü İsmayıl Bəqainin sözlərinə görə, dəfn mərasimlərində dünyanın təxminən 100 ölkəsindən nümayəndələrin iştirakı gözlənilir.
Onun bildirdiyinə görə, tədbirlərdə müxtəlif ölkələrin hökumət başçıları, parlament sədrləri, xarici işlər nazirləri və xüsusi nümayəndələri iştirak edəcəklər.
Bununla belə, indiyədək yüksək səviyyəli dövlət rəhbərlərinin iştirakı ilə bağlı təsdiqlənmiş siyahı məhduddur.
Məlumata əsasən, Pakistanın keçmiş Baş naziri Nəvaz Şərif dəfn mərasimində iştirak edəcək. Çin nümayəndə heyətinə Ümumçin Xalq Nümayəndələri Məclisi Daimi Komitəsinin sədr müavini He Vey rəhbərlik edəcək.
Hindistan isə xarici işlər nazirinin müavini Şri Pabitra və Bihar ştatının qubernatoru Səyyid Ata Hasnaynı Tehrana göndərəcək.
Gürcüstan Prezidenti Mixeil Kavelaşvili və Əfqanıstanda hakimiyyətdə olan "Taliban" hərəkatının yüksək vəzifəli nümayəndələrinin də mərasimlərdə iştirakı təsdiqlənib.
Dəfn mərasimlərinin İranın Tehran, Qum və Məşhəd şəhərlərində, həmçinin İraqın Nəcəf və Kərbəla şəhərlərində keçirilməsi planlaşdırılır.
Məlumata görə, ABŞ və İsrail fevralın 28-də İrana qarşı hərbi əməliyyatlara başlayıb. Bildirilir ki, həmin gün həyata keçirilən hücum nəticəsində İranın ali rəhbəri Ayətullah Əli Xamenei həlak olub.
