BAKI,TurkicWorld,Yusif Şərifzadə
ABŞ ilə İran arasında əldə olunmuş anlaşma memorandumu İsraildə narahatlıq yaradıb. Baş nazir Benyamin Netanyahu razılaşmaya açıq şəkildə qarşı çıxmasa da, israilli siyasətçilərin reaksiyaları və Livanda davam edən hərbi əməliyyatlar Təl-Əvivin prosesdən narazı olduğunu göstərir.
TurkicWorld xəbər verir ki, siyasi müşahidəçilər İsrail rəhbərliyinin həm ABŞ ilə münasibətləri qorumağa, həm də İranla bağlı mövqeyini müdafiə etməyə çalışdığını bildirirlər. Bu səbəbdən İsrail hazırda Vaşinqton, Tehran və Livan istiqamətlərində mürəkkəb siyasi vəziyyətlə üz-üzə qalıb.
Məlumata görə, ABŞ Prezidenti Donald Trampın İranla İsrailin birbaşa iştirakı olmadan razılaşmaya yaxınlaşması İsrail rəhbərliyində narazılıq doğurub. ABŞ-nin vitse-prezidenti Cey Di Vensin İsrailə yönəlmiş tənqidi açıqlamaları da bu narahatlığı artırıb.
Təhlillərə əsasən, bu vəziyyət qarşıdan gələn seçkilər ərəfəsində Benyamin Netanyahu üçün əlavə siyasi təzyiq yaradır. İsrail daxilində hökumətin İran siyasəti və ABŞ ilə münasibətləri seçki kampaniyasının əsas mövzularından birinə çevrilə bilər.
Ekspertlər hesab edirlər ki, Livandakı hərbi əməliyyatların davam etməsi və Vaşinqtonun Tehranla diplomatik təmasları İsrailin gələcək addımlarına birbaşa təsir göstərəcək.
