BAKI,TurkicWorld, Orxan Qədirzadə
ABŞ Konqresi səs çoxluğu ilə Prezident Vudro Vilsonun vetosunu ləğv edərək miqrasiyanın məhdudlaşdırılmasını nəzərdə tutan Miqrasiya Aktını qəbul edib
Qanun miqrantlar üçün savadlılıq (oxuyub-yazma) testini tələb edir, eyni zamanda bəzi Asiya mənşəli fəhlə miqrasiyasına məhdudiyyətlər tətbiq edirdi.
1917-ci il 5 fevralda qəbul olunan qanun ABŞ-a daxil olmaq istəyən şəxslər üçün savadlılıq şərti gətirməklə yanaşı, müəyyən istisnalar nəzərdə tuturdu. Xüsusi razılaşma və ya müqaviləsi olan ərazilərlə bağlı hallar istisna sayılırdı.
XIX əsrin sonu və XX əsrin əvvəllərində ABŞ dünyada miqrantların əsas istiqamətlərindən biri idi. Xüsusən Nyu-Yorkdakı Ellis adası həmin dövrdə miqrantların qəbulunda əsas mərkəzlərdən biri kimi tanınırdı. Bununla belə, 1890-cı illərdən başlayaraq miqrasiya axınlarına qarşı məhdudlaşdırıcı yanaşma tədricən güclənməyə başladı.
1894-cü ildə Bostonda yaradılmış Miqrasiya Məhdudlaşdırılması Liqası miqrantlar üçün savadlılıq tələbinin qanuniləşdirilməsi üçün hökumətə müraciətlər edirdi. Məqsəd, xüsusilə Cənubi və Şərqi Avropadan gələn aşağı gəlirli təbəqənin miqrasiyasını azaltmaq idi. 1897-ci ildə Konqres oxuyub-yazma tələbi ilə bağlı qanun layihəsini qəbul etsə də, Prezident Qrover Klivlend onu veto etmişdi.
1917-ci ildə isə ABŞ-ın Birinci Dünya müharibəsinə daxil olmasına az müddət qalmış ölkə daxilində yadellilərə qarşı qorxuların artdığı bir dövrdə yeni miqrasiya məhdudiyyəti paketi Prezident Vilsonun vetosuna baxmayaraq təsdiqlənib. Sonrakı illərdə miqrasiya göstəricilərinin azalması qeyd olunur və 1924-cü ildə qəbul edilən əlavə tənzimləmələrlə miqrantların öz ölkələrində yoxlanılması mexanizmi gücləndirilib.
