BAKI, TurkicWorld, Orxan Qədirzadə
ABŞ-da apellyasiya məhkəməsi fələstinli fəal Mahmud Xəlilin saxlanılması və deportasiyasına qarşı verdiyi müraciətin rədd edilməsinə qərar verib. Qərar Donald Tramp administrasiyasının mövqeyinə hüquqi üstünlük qazandırıb.
TurkicWorld xəbər verir ki, üç hakimdən ibarət apellyasiya paneli iki səsə qarşı bir səslə federal məhkəmənin ötən il Xəlilin azadlığa buraxılması barədə qərar çıxarmaq səlahiyyətinin olmadığını bildirib. Məhkəmə hesab edib ki, bu iş üzrə yurisdiksiya yalnız immiqrasiya məhkəmələrinə aiddir və məsələ İmmiqrasiya və Vətəndaşlıq Aktına uyğun olaraq həmin instansiyalarda araşdırılmalıdır.
Qərar Xəlilin yenidən saxlanılması ehtimalını artırır. O, ötən il immiqrasiya orqanları tərəfindən həbsdə saxlanıldığı müddətdə ilk övladının doğumunda iştirak edə bilməyib. Hüquq müdafiəçiləri bildirirlər ki, Xəlilin vəkilləri apellyasiya qərarından yuxarı instansiyaya şikayət verə bilərlər.
Suriyada doğulan, Əlcəzair vətəndaşlığına malik olan Mahmud Xəlil ABŞ-da daimi yaşayış icazəsinə sahibdir və ABŞ vətəndaşı ilə ailəlidir. O, Kolumbiya Universitetində magistratura səviyyəsində təhsil alarkən İsrail siyasətini tənqid edən fəaliyyətinə görə Tramp administrasiyasının deportasiya kampaniyasına məruz qalan onlarla xarici tələbədən biri olub.
Hüquq müdafiəçiləri bu addımları ABŞ-da söz azadlığı prinsiplərinin pozulması və xarici bir dövlətin tənqidinin boğulması kimi qiymətləndirirlər. Xəlilin işi paralel olaraq iki istiqamətdə aparılırdı: federal məhkəmədə saxlanmanın qanunsuzluğu ilə bağlı habeas corpus müraciəti və inzibati immiqrasiya məhkəmələrində deportasiyaya etiraz prosesi.
Apellyasiya məhkəməsi hökumətin arqumentini qəbul edərək bildirib ki, iddiaların qaldırılması üçün əsas hüquqi platforma yalnız immiqrasiya məhkəmələridir. Məhkəmə qərarında qeyd edib ki, Konqres tərəfindən müəyyən edilmiş immiqrasiya mexanizmləri Xəlilə sonradan deportasiya barədə yekun qərardan sonra iddialarını qaldırmaq üçün kifayət qədər hüquqi imkan verir.
