BAKI, TurkicWorld
Kanadanın Baş naziri Mark Karni, ABŞ-ın Kanada avtomobillərinə tətbiq edəcəyi 25 faizlik tariflərə qarşı tədbirlər görəcəklərini açıqlayıb.
TurkicWorld xəbər verir ki, Ottavada keçirdiyi mətbuat konfransında Karni, ABŞ Prezidenti Donald Trampın ticarət tarifləri siyasətinə cavab verməyə hazırlaşdıqlarını bildirib.
Onun sözlərinə görə, Kanada hökuməti ABŞ-dan idxal edilən avtomobil hissələrinə tarif tətbiq etməsə də, digər tədbirlər üzərində işləyir.
Mark Karni vurğulayıb ki, Kanada bu tədbirləri “ABŞ-da maksimum, Kanadada isə minimum təsir göstərmək” məqsədilə hazırlayır. O, Vaşinqtonun tarif siyasətinin nəticədə Amerika istehlakçılarına mənfi təsir edəcəyini və ABŞ rəhbərliyinin “kursunu dəyişəcəyinə” ümid etdiyini bildirib.
Qeyd edək ki, ABŞ Prezidenti Donald Trampın yeni sərəncamına əsasən, yalnız Kanada deyil, digər ölkələr də yüksək tariflərlə üzləşəcək. Yeni tariflər çərçivəsində Çinə 34 faiz, Avropa İttifaqına 20 faiz, Vyetnama 46 faiz, Tayvana 32 faiz, Yaponiyaya 24 faiz, Hindistana 26 faiz və Türkiyəyə isə 10 faiz rüsum tətbiq ediləcək.
Tramp administrasiyasının yeni ticarət siyasəti qlobal iqtisadiyyatda ciddi təsirlərə səbəb ola bilər.
