BAKI,TurkicWorld, Orxan Qədirzadə
BAYKAR tərəfindən hazırlanan yeni nəsil pilotsuz sistemlər müasir döyüş konsepsiyasını dəyişdirəcək imkanlarını nümayiş etdirib.
TurkicWorld xəbər verir ki, şirkətin milli və yerli imkanlarla hazırladığı K2 kamikadze İHA və “Sivrisinek” dolanan sursatı Keşan Təlim və Sınaq Mərkəzində keçirilən demo uçuşlarında təqdim olunub.
Sınaqlar zamanı platformalar süni intellekt dəstəkli sürü avtonomiyası, GNSS-dən asılı olmayan naviqasiya, avtomatik hədəf aşkarlama və hücum imkanlarını uğurla nümayiş etdirib.
Məlumata görə, demo uçuşu çərçivəsində 5 ədəd K2 kamikadze İHA ardıcıl şəkildə havaya qalxaraq müxtəlif döyüş formasiya modellərində uçuş icra edib. Daha sonra bu platformalara 10 ədəd “Sivrisinek” dolanan sursat qoşularaq vahid sürü sistemi formalaşdırılıb.
Sistemlər elektron müharibə şəraitində də fəaliyyət qabiliyyətini sübut edib. Süni intellekt əsaslı vizual naviqasiya sayəsində GNSS siqnalları olmadan belə dəqiq koordinasiya və hərəkət mümkün olub.
Demo çərçivəsində “Sivrisinek” platformaları hədəflərə koordinat üzrə hücum həyata keçirərkən, K2 kamikadze İHA yüksək sürətli dalış manevrləri ilə hücum ssenarilərini icra edib.
Ekspertlər bildirirlər ki, 1000 kilometrdən artıq əməliyyat radiusuna malik olan “Sivrisinek” sistemi döyüş meydanında strateji üstünlük yarada bilər.
Qeyd olunur ki, K2 və “Sivrisinek” platformaları ilk dəfə geniş ictimaiyyətə 5-9 may tarixlərində İstanbulda keçiriləcək SAHA 2026 sərgisində təqdim olunacaq.
BAYKAR-ın son illərdə pilotsuz sistemlər sahəsində əldə etdiyi uğurlar şirkəti qlobal bazarda lider mövqeyə çıxarıb və yüksək texnologiyalı ixracda əsas oyunçulardan birinə çevirib.
