BAKI, TurkicWorld, Orxan Qədirzadə
Türkiyənin Hakkari vilayətinin Yüksekova rayonunda Türkiyə Silahlı Qüvvələrinə məxsus döyüş təyyarələrinin sərhəd xətti boyunca patrul uçuşları həyata keçirdiyi bildirilib.
TurkicWorld xəbər verir ki, yerli mənbələrin məlumatına görə, İran sərhədi istiqamətində yerləşən ərazilərdə müəyyən fasilələrlə Türkiyə hərbi təyyarələrinin uçuşları müşahidə edilib.
Məlumata əsasən, təyyarələrin sərhəd xətti boyunca patrul fəaliyyəti həyata keçirdiyi və uçuşların təhlükəsizlik tədbirləri çərçivəsində həyata keçirildiyi ehtimal olunur. Hadisə ilə bağlı rəsmi qurumlar tərəfindən hələlik açıqlama verilməyib.
Yerli mənbələr bölgədə hər hansı insident və ya təhlükəli vəziyyətin qeydə alınmadığını, sərhəd xəttində vəziyyətin sabit olduğunu bildiriblər.
Qeyd edək ki, bundan əvvəl Türkiyənin Milli Müdafiə Nazirliyi İran ərazisindən buraxılan və Türkiyə hava məkanına doğru yönəldiyi müəyyən edilən ballistik sursatın NATO-nun Şərqi Aralıq dənizində yerləşdirilmiş hava və raketdən müdafiə sistemləri tərəfindən zərərsizləşdirildiyini açıqlamışdı.
Nazirliyin məlumatına görə, Hatay vilayətinin Dörtyol rayonunda aşkar edilən sursat qalıqlarının havada məhv edilən təhlükəyə qarşı istifadə edilən hava müdafiə sisteminə aid olduğu müəyyən olunub və hadisə nəticəsində ölən və ya yaralanan olmayıb.
