BAKI, TurkicWorld
Türkiyə tarixində ilk dəfə reaktiv mühərrik ixrac edib.
TurkicWorld xəbər verir ki, Türkiyənin Kale Jet motorları şirkəti, Braziliyada keçirilən LAAD Müdafiə və Təhlükəsizlik Sərgisində Braziliyalı SIATT şirkəti ilə KTJ-3200 turboreaktiv raket mühərrikinin ixracı və təchizatı ilə bağlı müqavilə imzalayıb.
Hazırda kütləvi istehsalda olan və təhvil-təslim prosesi davam edən KTJ-3200 mühərriki ilə Türkiyə raketlərinin inkişafı istiqamətində uğurlu testlər həyata keçirilir.
Məlumat üçün bildirək ki, KTJ-3200 turboreaktiv mühərriki 330 mm diametrə və 50 kiloqram çəkiyə malikdir. Bu mühərrik 3200 nyutonadək itki gücü yarada bilir. İki fərqli variantda istehsal olunan KTJ-3200, Türkiyənin yerli istehsalı olan SOM və Atmaca qanadlı raketlərinə güc verir.
Kale Jet Motorları şirkəti KTJ-3200-dən əldə etdiyi texnoloji bilik və təcrübə ilə fərqli turboreaktiv mühərrikləri üzərində də işlərini davam etdirir. Bu, Türkiyənin müdafiə sənayesində ixrac qabiliyyətini artırmaqla yanaşı, mühərrik texnologiyalarında da strateji müstəqilliyini gücləndirir.
