İsveç Türkiyə ilə üçtərəfli memoranduma sadiqdir - Müdafiə Nazirliyi

İsveç Türkiyə ilə üçtərəfli memoranduma sadiqdir - Müdafiə Nazirliyi

Bakı. TurkicWorld:

İsveç NATO-nun Madriddə keçirilən Sammiti çərçivəsində Türkiyə və Finlandiya ilə imzalanmış Üçtərəfli Memoranduma sadiqdir və diqqəti onun həyata keçirilməsinə yönəldir.

TurkicWorld xəbər verir ki, bunu çərşənbə günü jurnalistlərə açıqlamasında İsveçin müdafiə naziri Pol Yonson deyib.

"Biz Türkiyə, İsveç və Finlandiya arasında imzalanmış üçtərəfli memoranduma əməl etməyə davam edirik və səylərimizi onun həyata keçirilməsinə yönəltmişik. NATO ilə hərbi razılaşmalarımız davam edir. Bu təşəbbüslər çərçivəsində Türkiyənin Milli Müdafiə naziri Hulusi Akarla görüş nəzərdə tutulsa da, görüş ləğv edilib. Biz əvvəlki formatda danışıqların bərpasını səbirsizliklə gözləyirik", - deyə nazir bildirib.

Eyni zamanda, nazir tərəflərin "irəliləyiş əldə etdiyi" fikrini ifadə edib. "Biz NATO-ya üzv olmaq istəyirik və bunun belə olacağına inanırıq", - P.Yonson bildirib.