Bakı, TurkicWorld, Orxan Qədirzadə
Azərbaycan Respublikası Milli Məclisinin Qaradağ rayonundan seçilmiş deputatı Aydın Hüseynov rayonda fəaliyyət göstərən Bakı 21 saylı Mediasiya Təşkilatını ziyarət edib.
TurkicWorld xəbər verir ki, ziyarət çərçivəsində millət vəkili müəssisənin iş şəraiti və fəaliyyət istiqamətləri ilə yaxından tanış olub.
Deputat təşkilatın rəhbərliyi və mediatorlarla keçirdiyi görüşdə mediasiya institutunun cəmiyyətdəki rolu, vətəndaş məmnunluğunun artırılması və hüquqi maarifləndirmə məsələləri ətrafında geniş fikir mübadiləsi aparıb. Görüş zamanı Aydın Hüseynov mediasiya proseslərinin səmərəliliyinin yüksəldilməsi ilə bağlı öz tövsiyə və məsləhətlərini diqqətə çatdırıb.
Görüşün sonunda Bakı 21 saylı Mediasiya Təşkilatının direktoru Zaur Mirzəbəyov göstərilən diqqətə görə millət vəkilinə minnətdarlığını bildirib və ona xatirə hədiyyəsi təqdim edib. Qeyd olunub ki, bu cür ziyarətlər mediasiya proseslərinin təşviqi və vətəndaşların hüquqlarının effektiv qorunması istiqamətində dövlət qurumları ilə əməkdaşlığın güclənməsinə xidmət edir.
