Bakı. TurkicWorld:
Nigerdə qalan fransız kontingentinin sonuncusu dekabrın 22-də səhər saatlarında bu Afrika ölkəsini tərk edib.
TurkicWorld verir ki, bu barədə Le Figaro məlumat yayıb.
Niger leytenantı Salim İbrahim fransız qoşunlarının çıxarılması ilə bağlı mərasimdən sonra deyib: "Bugünkü tarix (...) Fransa qüvvələrinin Saheldəki öhdəliklərinə son vermə prosesinin sona çatdığını göstərir". Mərasim kontingentin bir hissəsinin yerləşdiyi Niameydəki aviabazada baş tutub.
Mərasimin sonunda Niger quru qoşunlarının qərargah rəisi, polkovnik Maman Sani Kiau və Fransanın Saheldəki qüvvələrinin komandanı general Erik Ozan tərəfindən “birgə sənəd” imzalanıb. İbrahimin sözlərinə görə, Niger tərəfi "heç bir əhəmiyyətli insident qeydə alınmayan" Fransa ordusunun çıxarılmasından razıdır.
Nigerdə yerləşdirilən 1500 fransız əsgəri və təyyarə mexaniklərindən sonuncusu səhər saatlarında iki təyyarə ilə Niameydən havaya qalxıb.
Fransız kontingenti on il Nigerdə idi, onun vəzifəsi Saheldə terrorçu islamçı qruplarla mübarizə aparmaq idi.
