BAKI,TurkicWorld,Yusif Şərifzadə
Beynəlxalq Atom Enerjisi Agentliyinin İdarə Heyəti İranın nüvə obyektlərinə beynəlxalq müfəttişlərin girişinə icazə verməməsi ilə bağlı məsələni BMT Təhlükəsizlik Şurasına göndərməyi nəzərdə tutan qətnaməni qəbul edib.
TurkicWorld xəbər verir ki, 35 üzvdən 23-ü qətnamənin lehinə səs verib, 3 üzv əleyhinə çıxıb, 8 üzv isə bitərəf qalıb.
İranın Birləşmiş Millətlər Təşkilatındakı Daimi Nümayəndəliyi qətnamənin qəbul edilməsini pisləyib və sənədi “qərəzli, siyasi qətnamə” adlandırıb.
Qətnamə ABŞ, Böyük Britaniya, Fransa və Almaniya tərəfindən hazırlanıb. Səsvermədən əvvəl Çin, Rusiya və İran birgə bəyanat yayaraq sənədə qarşı çıxıblar.
Pekin, Moskva və Tehran İranın BAEA müfəttişlərinin nüvə obyektlərinə girişinə mane olması ilə bağlı iddiaları “siyasi motivli və əsassız” hesab etdiklərini bildiriblər.
İran məsələsinin BMT Təhlükəsizlik Şurasına çıxarılmasından sonra Şuranın Tehrana qarşı hansı addımları ata biləcəyi hələ aydın deyil.
Çin və Rusiya BMT Təhlükəsizlik Şurasının daimi üzvləri olduqları üçün veto hüququna malikdirlər. Bu isə İrana qarşı hər hansı qətnamənin qəbulunun qarşısını almaq imkanını onlara verir.
Qətnamənin qəbul edilməsi İranın nüvə proqramı ətrafında diplomatik gərginliyin daha da artmasına səbəb ola bilər.
