BAKI,TurkicWorld,Yusif Şərifzadə
ABŞ-də dizel yanacağının orta qiyməti İran müharibəsinin yanacaq təchizatına təsirləri fonunda rekord səviyyəyə yüksəlib. Bahalaşma kənd təsərrüfatı, nəqliyyat və ərzaq qiymətləri üzərində əlavə təzyiq yaradıb.
TurkicWorld xəbər verir ki, Amerika Avtomobil Assosiasiyasının məlumatına görə, ABŞ-də dizelin orta qiyməti son bir ildə qallon üçün 2 dollardan çox artıb və cümə günü 5,85 dollara çatıb.
Assosiasiya bildirib ki, bu göstərici 1970-ci illərdən bəri qiymət monitorinqinə başlanıldıqdan sonra qeydə alınan ən yüksək orta səviyyədir.
Məlumata görə, bir il əvvəl sürücülər dizelin bir qallonu üçün təxminən 3,71 dollar ödəyirdilər.
Dizel yanacağından geniş istifadə edən fermerlər artıq artan xərclərlə üzləşirlər. Yanacaq kənd təsərrüfatı texnikalarının işləməsi və ərzaq məhsullarının mağazalara daşınması üçün əsas resurslardan biridir.
Bununla yanaşı, ABŞ fermerləri gübrə qiymətlərinin artması ilə də mübarizə aparır və bu amil istehlakçılar üçün ərzaq qiymətlərinin yüksəlməsinə təsir göstərir.
Müstəqil Baqqalçılar Alyansının hesablamalarına görə, bəzi ərzaq məhsullarında yanacaqla bağlı xərclər ümumi maya dəyərinin 15-30 faizini təşkil edə bilər.
Yanacağın bahalaşması İran münaqişəsinin başlamasından sonra sürətlənib. Tehranın Hörmüz boğazında məhdudiyyətlər tətbiq etməsi və neft-qaz ixracına təsir edən addımları qlobal enerji bazarlarında gərginliyi artırıb.
Qlobal neft qiymətləri son həftələrdə yüksək olaraq qalır və ABŞ ilə İran arasında qarşılıqlı hücumların artması fonunda yenidən yüksəlib.
